ਅਵਤਾਰ ਸਿੰਘ ਮਿਸ਼ਨਰੀ,ਬਹਾਲ ਸਿੰਘ ਕਵੀਸ਼ਰ,ਬਾਬਾ ਨੰਦ ਸਿੰਘ ਸਿੱਧਵਾਂ (ਮਰਹੂਮ),ਡਾ ਗੁਰਮੀਤ ਸਿੰਘ ਬਰਸਾਲ,ਪ੍ਰੋ ਸੁਰਜੀਤ ਸਿੰਘ ਨੰਨੂਆ,
ਚਰਨਜੀਤ ਸਿੰਘ ਪੰਨੂੰ,ਹਰਸਿਮਰਤ ਕੌਰ ਖਾਲਸਾ,ਪਰਮਿੰਦਰ ਸਿੰਘ ਪਰਵਾਨਾ,ਹਿੰਮਤ ਸਿੰਘ ਹਿੰਮਤ,ਜਸਦੀਪ ਸਿੰਘ ਗੋਲਡ ਕੈਬ

ਅਵਤਾਰ ਸਿੰਘ ਮਿਸ਼ਨਰੀ

ਕੁਲਵੰਤ ਸਿੰਘ,ਡਾ ਗੁਰਮੀਤ ਸਿੰਘ ਬਰਸਾਲ,ਸਰਬਜੀਤ ਸਿੰਘ ਸੈਕਰਾਮੈਂਟੋ,ਬਲਜੀਤ ਸਿੰਘ ਦੁਪਾਲਪੁਰ

ਡਾ ਗੁਰਮੀਤ ਸਿੰਘ ਬਰਸਾਲ,ਚੰਨਾ ਕੈਲੇਫੋਰਨੀਆਂ(ਖੁੰਡ ਚਰਚਾ)

ਡਾ ਗੁਰਮੀਤ ਸਿੰਘ ਬਰਸਾਲ,ਬਲਜੀਤ ਸਿੰਘ ਦੁਪਾਲਪੁਰ,ਬਲਵਿੰਦਰ ਸਿੰਘ ਲੰਗੜੋਆ

ਡਾ ਗੁਰਮੀਤ ਸਿੰਘ ਬਰਸਾਲ,ਤਰਲੋਚਨ ਸਿੰਘ ਦੁਪਾਲਪੁਰ,ਪ੍ਰੋ ਦਰਸ਼ਨ ਸਿੰਘ ਖਾਲਸਾ,ਗੁਰਮੀਤ ਸਿੰਘ(ਸਿੰਘ ਸਭਾ ਯੂ ਐਸ ਏ)ਕੁਲਵੰਤ ਸਿੰਘ

The sikh character

ਫਿਲਮ ਕਲਾਕਾਰ ਆਮਿਰ ਖਾਨ ਇਕ ਸਿੰਘ ਨੂੰ ਹੌਸਲਾਜਨਕ ਕਾਰਵਾਈ ਕਾਰਣ ਸਨਮਾਨ ਕਰਦੇ ਹੋਏ

Harsimrat Kaur Khalsa- Duen Da Kung Fu Demo.mov

ਬੀਬੀ ਹਰਸਿਮਰਤ ਕੌਰ ਖਾਲਸਾ ਮਾਰਸ਼ਲ ਆਰਟ ਦੀ ਪਰਦਰਸ਼ਨੀ ਕਰਦੇ ਹੋਏ

ਸਿੰਗਾਪੁਰ ਦੇ ਵੱਖ ਵੱਖ ਗੁਰਦਵਾਰਿਆਂ ਵਿੱਚ ਗੁਰਮਤਿ ਪ੍ਰਚਾਰ

ਸਿੰਗਾਪੁਰ ਦੇ ਵੱਖ ਵੱਖ ਗੁਰਦਵਾਰਿਆਂ ਵਿੱਚ ਗੁਰਮਤਿ ਪ੍ਰਚਾਰ




ਗੁਰੂ ਗ੍ਰੰਥ ਪ੍ਰਚਾਰ ਮਿਸ਼ਨ ਯੂ ਐਸ ਏ ਦੇ ਭਾਈ ਅਵਤਾਰ ਸਿੰਘ ਮਿਸ਼ਨਰੀ ਅਤੇ ਬੀਬੀ ਹਰਸਿਮਰਤ ਕੌਰ ਖਾਲਸਾ ਨੇ ਸਿੰਗਾਪੁਰ ਦੇ ਵੱਖ ਵੱਖ ਗੁਰਦਵਾਰਿਆਂ ਵਿੱਚ ਗੁਰਮਤਿ ਪ੍ਰਚਾਰ ਕੀਤਾ
ਗੁਰੂ ਗ੍ਰੰਥ ਪ੍ਰਚਾਰ ਮਿਸ਼ਨ ਦੇ ਭਾਈ ਅਵਤਾਰ ਸਿੰਘ ਮਿਸ਼ਨਰੀ ਅਤੇ ਬੀਬੀ ਹਰਸਿਮਰਤ ਕੌਰ ਖਾਲਸਾ ਵੱਲੋਂ ਸਿੰਘਾਪੁਰ ਵਿਖੇ ਕਥਾ-ਕੀਰਤਨ ਅਤੇ ਸੈਮੀਨਾਰਾਂ ਰਾਹੀਂ ਗੁਰਮਤਿ ਪ੍ਰਚਾਰ

ਪ੍ਰੋ.ਜਸਵੰਤ ਸਿੰਘ ਸਿੰਘਾਪੁਰ ਅਤੇ ਸਿੱਖ ਸੈਂਟਰ ਸਿੰਘਾਪੁਰ ਦੇ ਪ੍ਰਬੰਧਕਾਂ ਦੇ ਸਹਿਯੋਗ ਸਦਕਾ 11 ਨਵੰਬਰ 2011 ਤੋਂ ਕਥਾ-ਕੀਰਤਨ ਅਤੇ ਗੁਰਮਤਿ ਵਿਚਾਰਾਂ ਦੀਆਂ ਕਲਾਸਾਂ ਅਤੇ ਸੈਮੀਨਾਰ ਚੱਲ ਰਹੇ ਹਨ। ਜਿਨ੍ਹਾਂ ਵਿੱਚ 11-12-2011 ਸ਼ਨੀਵਾਰ ਨੂੰ ਸਿੱਖ ਸੈਂਟਰ ਸਿੰਘਾਪੁਰ ਵਿਖੇ ਕਾਨਫਰੰਸ ਹਾਲ ਵਿਖੇ ਦੁਪਹਿਰੇ 2:30 ਤੋਂ 3:30 ਤੱਕ "ਕਿਵ ਸਚਿਆਰਾ ਹੋਵੀਐ" ਵਿਸ਼ੇ ਤੇ ਸੈਮੀਨਾਰ ਵਿੱਚ ਬੀਬੀ ਹਰਸਿਮਰਤ ਕੌਰ ਖਾਲਸਾ ਨੇ ਕੀਰਤਨ ਕਰਦੇ ਡੈਲੀਗੇਟਾਂ ਨੂੰ ਸੰਬੋਧਨ ਹੁੰਦੇ ਦੱਸਿਆ ਕਿ ਸਿੱਖ ਨੇ ਗੁਰਬਾਣੀ ਦਾ ਉਪਦੇਸ਼ ਰੂਪੀ ਅੰਮ੍ਰਿਤ ਛੱਕ, ਹੁਕਮ ਰਜ਼ਾਈ ਚੱਲ ਅਤੇ ਵਿਕਾਰਾਂ ਦਾ ਤਿਆਗ ਕਰਕੇ ਸਚਿਆਰੇ ਹੋਣਾ ਹੈ। ਅਖੌਤੀ ਕਰਮਕਾਂਡ ਛੱਡਣੇ ਹਨ ਜੋ ਸੱਚ ਦੇ ਪਾਂਧੀ ਨਹੀਂ ਬਣਨ ਦਿੰਦੇ। ਇਸ ਤੋਂ ਬਾਅਦ ਭਾਈ ਅਵਤਾਰ ਸਿੰਘ ਨੇ ਆਏ ਜਗਿਆਸੂਆਂ ਨੁੰ, ਬੀਬੀ ਹਰਸਿਮਰਤ ਕੌਰ ਖਾਲਸਾ ਦੀ ਜਾਣ ਪਛਾਣ ਕਰਾਉਂਦੇ ਹੋਏ ਕਿਹਾ ਕਿ ਹਰਸਿਮਰਤ ਕੌਰ ਖਾਲਸਾ ਜਿਸ ਦਾ ਪਹਿਲਾ ਨਾਂ ਨੈਨਸੀ ਤੋਬਸਮੈਨ ਸੀ ਕਿਵੇਂ ਪੰਜਾਂ ਮਹੀਨਿਆਂ ਵਿੱਚ ਪੰਜਾਬੀ ਸਿੱਖ ਕੇ ਗੁਰਬਾਣੀ ਪੜ੍ਹਨੀ ਸਿੱਖੀ ਤੇ ਹੁਣ ਪੰਜਾਬੀਆਂ ਨੂੰ ਸਿੱਖਣ ਲਈ ਪ੍ਰੇਰ ਰਹੀ ਹੈ। ਭਾਈ ਅਵਤਾਰ ਸਿੰਘ ਜੀ ਨੇ ਕਿਵ ਸਚਿਆਰਾ ਤੇ ਬੋਲਦਿਆਂ ਦਰਸਾਇਆ ਕਿ ਪਹਿਲੇ ਸਚਿਆਰ ਬਣਨ ਭਾਵ ਰੱਬ ਨੂੰ ਪਾਉਣ ਲਈ ਵੱਖ-ਵੱਖ ਧਰਮ ਆਗੂਆਂ ਨੇ ਵੱਖ-ਵੱਖ ਰਾਹ ਦੱਸੇ ਜੋ ਬਾਅਦ ਵਿੱਚ ਕਰਮਕਾਂਡ ਬਣ ਗਏ ਜਿਵੇਂ ਸੁੱਚ-ਭਿੱਟ ਰੱਖਣਾ, ਭੁੱਖੇ ਰਹਿ ਤਿਆਗੀ ਬਣਨਾ, ਹਜ਼ਾਰਾਂ ਮਨ ਘੜਤ ਉਕਤੀਆਂ ਯੁਕਤੀਆਂ ਵਰਤਨੀਆਂ ਭਾਵ ਸੱਚੇ ਮਾਰਗ ਨੂੰ ਛੱਡ ਕੇ ਥੋਥੇ ਕਰਮਕਾਂਡਾਂ ਦੇ ਚੱਕਰ ਵਿੱਚ ਪੈ ਰਹਿਣਾ। ਭਾਈ ਸਾਹਿਬ ਨੇ ਹੋਰ ਕਿਹਾ ਕਿ ਅਜੋਕਾ ਡੇਰਾ ਵਾਦ ਵੀ ਸਿੱਖ ਦੇ ਸਚਿਆਰ ਬਣਨ ਦੇ ਰਸਤੇ ਦਾ ਰੋੜਾ ਹੈ। ਜੋ ਸ਼ਬਦ ਗਾਇਨ ਕੀਤੇ ਜਾਂ ਵਿਚਾਰੇ ਜਾਂਦੇ ਉਨ੍ਹਾਂ ਨੂੰ ਸਕਰੀਨ ਤੇ ਵੀ ਨਾਲੋਂ ਨਾਲ ਦਿਖਾਇਆ ਜਾਂਦਾ। ਜਗਿਆਸੂਆਂ ਦੇ ਸ਼ੰਕਿਆਂ ਦੇ ਉੱਤਰ ਵੀ ਦਿੱਤੇ ਗਏ। ਸਿੱਖ ਤੋਂ ਇਲਾਵਾ ਚਾਈਨਾ ਮੂਲ ਦੇ ਸਰਧਾਲੂ ਵੀ ਹਾਜਰੀ ਭਰਦੇ ਰਹੇ।

11-13-2011 ਦਿਨ ਐਤਵਾਰ ਨੂੰ "ਨਾਮ-ਸਿਮਰਨ" ਦੇ ਵਿਸ਼ੇ ਤੇ ਬਣੇ ਪ੍ਰੋਗਰਾਮ ਅਨੁਸਾਰ ਗੁਰਦੁਆਰਾ ਕਤੌਂਗ ਸਿੰਗਾਪੁਰ ਵਿਖੇ ਕਥਾ ਵਖਿਆਨ ਕੀਰਤਨ ਕੀਤਾ ਗਿਆ, ਪਹਿਲੇ ਭਾਈ ਅਵਤਾਰ ਸਿੰਘ ਨੇ ਨਾਮ ਸਿਮਰਨ ਦੀ ਸੰਖੇਪ ਵਿਆਖਿਆ ਕਰਕੇ ਸੰਗਤ ਨੂੰ ਦੱਸਿਆ ਕਿ ਸੰਸਾਰ ਦੇ ਕੰਮ ਧੰਦੇ ਕਰਦੇ ਹੋਏ ਸੱਚੇ ਦਿਲੋਂ ਪਰਮੇਸ਼ਰ ਦੀ ਯਾਦ ਨੂੰ ਹਿਰਦੇ ਵਿੱਚ ਵਸਾਈ ਰੱਖਣਾ ਹੀ ਸਿਮਰਨ ਹੈ। ਸਾਨੂੰ ਦੱਸੀਆਂ ਜਾ ਰਹੀਆਂ ਕਰਮ-ਕਾਂਡੀ ਵਿਧੀਆਂ ਜਿਵੇਂ ਅੱਖਾਂ ਮੀਟਣਾ, ਗਿਣਤੀ ਦੀ ਮਾਲਾ ਫੇਰਨੀ, ਕਿਸੇ ਇੱਕ ਸ਼ਬਦ ਦਾ ਤੋਤਾ ਰਟਨ ਕਰਨਾ ਸਿਮਰਨ ਨਹੀਂ ਜਿਨ੍ਹਾਂ ਚਿਰ ਅਸੀਂ ਗੁਰ ਉਪਦੇਸ਼ ਨੂੰ ਕਮਾਉਂਦੇ ਨਹੀਂ-ਗਾਏਂ ਸੁਣੇ ਆਂਖੇ ਮੀਚੈਂ ਪਾਈਐ ਨਾ ਪਰਮ ਪਦ ਗੁਰ ਉਪਦੇਸ਼ ਗਹਿ ਜਉ ਲਉ ਨਾ ਕਮਾਈਐ॥ (ਭਾ.ਗੁ.) ਭਾਈ ਸਾਹਿਬ ਨੇ ਇਹ ਵੀ ਦੱਸਿਆ ਕਿ ਸਿਮਰਨ ਦੀ ਵਿਧੀ ਗੁਰਬਾਣੀ ਅਨੁਸਾਰ ਬੜੀ ਸੁਖਾਲੀ ਹੈ ਜਿਵੇਂ ਆਨੀਲੇ ਕਾਗਦੁ ਕਾਟੀਲੇ ਗੂਡੀ ਅਕਾਸ਼ ਮਧੇ ਭਰਮੀਅਲੇ..॥(972) ਵਾਲੇ ਸ਼ਬਦ ਵਿੱਚ ਦਰਸਾਈ ਹੈ ਕਿ ਜਿਵੇਂ ਬੱਚਾ ਪਤੰਗ ਉਡਾਉਂਦੇ ਸਮੇ ਸਾਥੀਆਂ ਨਾਲ ਗੱਲਾਂ ਕਰਦਾ ਹੋਇਆ ਆਪਣਾ ਧਿਆਨ ਡੋਰ ਵੱਲ ਰੱਖਦਾ ਹੈ ਕਿ ਕਿਤੇ ਦੂਸਰਾ ਉਸ ਦੀ ਡੋਰ ਨਾਂ ਕੱਟ ਦੇਵੇ, ਸੁਨਿਆਰਾ ਸੋਨਾ ਘੜਦਾ, ਗਾਹਕਾਂ ਨਾਲ ਗੱਲਾਂ ਕਰਦਾ, ਸਾਰਾ ਧਿਆਨ ਘਾੜਤ ਵੱਲ ਰੱਖਦਾ ਹੈ,ਪਾਣੀ ਦੇ ਘੜੇ ਸਿਰਾਂ ਤੇ ਚੁੱਕੀ ਆਉਂਦੀਆਂ ਕੁੜੀਆਂ ਸਹੇਲੀਆਂ ਨਾਲ ਗੱਲਾਂ ਕਰਦੀਆਂ ਧਿਆਨ ਘੜਿਆਂ ਵੱਲ ਰੱਖਦੀਆਂ ਹਨ, ਪੰਜ ਕੋਹ ਦੂਰ ਘਾਹ ਚਰਦੀ ਗਾਂ ਆਪਣਾ ਧਿਆਨ ਵੱਛੇ ਵੱਲ ਰੱਖਦੀ ਹੈ ਅਤੇ ਮਾਂ ਗੋਦੀ ਵਾਲੇ ਬੱਚੇ ਨੂੰ ਪੰਘੂੜੇ ਪਾ ਕੇ ਘਰ ਦੇ ਕੰਮ ਕਾਰ ਕਰਦੀ ਹੋਈ ਆਪਣਾ ਚਿੱਤ ਬੱਚੇ ਵੱਲ ਰੱਖਦੀ ਹੈ ਇਵੇਂ ਹੀ ਸਿੱਖ ਨੇ ਦੁਨੀਆਦਾਰੀ ਦੇ ਕਾਰ ਵਿਹਾਰ ਕਰਦੇ ਰੱਬ ਨੂੰ ਸਦਾ ਯਾਦ ਰੱਖਣਾ ਹੈ।

ਫਿਰ 10:30 ਤੋਂ 11 ਵਜੇ ਤੱਕ ਗੁਰਦੁਆਰਾ ਯੀਸੁਨ ਵਿਖੇ ਵੀ "ਨਾਮ-ਸਿਮਰਨ" ਤੇ ਹੀ ਕੀਰਤਨ ਵਖਿਆਨ ਕੀਤਾ ਗਿਆ। ਫਿਰ ਦੁਪਹਿਰੇ 2:30 ਤੋਂ 3:30 ਸਿੱਖ ਸੈਂਟਰ ਦੀ ਸਤਵੀਂ ਮੰਜ਼ਲ ਤੇ ਬਣੇ ਕਾਨਫਰੰਸ ਹਾਲ ਵਿੱਚ ਜਨਮ ਮਰਨ ਅਤੇ ਪੁਨਰ ਜਨਮ ਬਾਰੇ ਸੈਮੀਨਾਰ ਕੀਤਾ ਗਿਆ, ਇਸ ਸਮੇਂ ਕਾਨਫਰੰਸ ਹਾਲ ਭਰ ਗਿਆ, ਚੀਨੇ ਵੀ ਆਏ। ਪ੍ਰੋ. ਜਸਵੰਤ ਸਿੰਘ ਸਿੰਗਾਪੁਰ ਨੇ ਸਟੇਜ ਦੀ ਸੇਵਾ ਨਿਭਾਈ। ਪਹਿਲੇ ਭਾਈ ਅਵਤਾਰ ਸਿੰਘ ਨੇ ਗੁਰਬਾਣੀ ਦਾ ਹਵਾਲਾ ਦਿੰਦੇ ਦਰਸਾਇਆ ਕਿ ਜਿਵੇਂ ਇੱਕ ਰੁੱਖ ਨੂੰ ਫੁੱਲ ਅਤੇ ਫਲ ਲਗਦੇ ਹਨ ਪਰ ਕੋਈ ਹਨੇਰੀ ਜਾਂ ਬਿਮਾਰੀ ਕਰਕੇ ਕੱਚੇ, ਕੋਈ ਡੱਡਰੇ ਅਤੇ ਕੋਈ ਪੱਕ ਕੇ ਡਾਹਣਾਂ ਨਾਲੋਂ ਟੁੱਟ ਜਾਂਦੇ ਹਨ ਫਿਰ ਦੁਬਾਰਾ ਉਨ੍ਹਾਂ ਨੂੰ ਡਾਹਣਾਂ ਨਾਲ ਨਹੀਂ ਜੋੜਿਆ ਜਾ ਸਕਦਾ ਇਵੇਂ ਹੀ ਸੰਸਾਰ ਰੂਪੀ ਰੁੱਖ ਨੂੰ ਅਸੀਂ ਜੀਵਾਂ ਰੂਪੀ ਫਲ ਲੱਗੇ ਹੋਏ ਹਾਂ। ਕੋਈ ਬਚਪਨ, ਕੋਈ ਜਵਾਨੀ ਅਤੇ ਕੋਈ ਬੁਢੇਪੇ ਵਿੱਚ ਇਸ ਸੰਸਾਰ ਰੁੱਖ ਨਾਲੋਂ ਟੁੱਟ ਜਾਂਦਾ ਹੈ ਦੁਬਾਰਾ ਨਹੀਂ ਜੁੜਦਾ ਫੁਰਮਾਨ ਹੈ-ਕਬੀਰ ਮਾਨਸ ਜਨਮੁ ਦਲੰਭੁ ਹੈ ਹੋਇ ਨਾ ਬਾਰੈ ਬਾਰ॥ ਜਿਉਂ ਬਨ ਫਲ ਲਾਗੇ ਭੁਇਂ ਗਿਰਹਿ ਬਹੁਰ ਨਾ ਲਾਗਹਿ ਡਾਰਿ॥(1366) ਫਿਰ ਹਰਸਿਮਰਤ ਕੌਰ ਨੇ ਇਸੇ ਸ਼ਬਦ ਦਾ ਕੀਰਤਨ ਕਰਦੇ ਹੋਏ ਬੜੇ ਵਿਸਥਾਰ ਨਾਲ ਗੁਰਬਾਣੀ ਦੀਆਂ ਅਨੇਕਾਂ ਪੰਕਤੀਆਂ ਕੋਟ ਕਰਕੇ ਦਰਸਾਇਆ ਕਿ ਸਾਡਾ ਪਿਛਲਾ ਜਨਮ ਸਾਡੇ ਵੱਡੇ ਵਡੇਰੇ ਤੇ ਮਾਂ ਬਾਪ ਹਨ ਅਤੇ ਅਗਲਾ ਜਨਮ ਸਾਡੇ ਬੱਚੇ ਹਨ। ਸਾਡੇ ਸਰੀਰ ਦੇ ਜੀਨਸ ਅੱਗੇ ਪੀੜੀ ਦਰ ਪੀੜੀ ਚਲਦੇ ਰਹਿੰਦੇ ਹਨ ਮਰਦੇ ਨਹੀਂ। ਜਿਨ੍ਹਾਂ ਚਿਰ ਪ੍ਰਮਾਤਮਾਂ ਦੀ ਜੋਤ ਸਾਡੇ ਸਰੀਰ ਵਿੱਚ ਹੈ ਅਸੀਂ ਜਿੰਦਾ ਹਾਂ ਜਦੋਂ ਵੱਖ ਹੋ ਜਾਂਦੀ ਹੈ ਸਾਡੇ ਸਰੀਰ ਤੇ ਤੱਤ ਆਪੋ ਆਪਣੇ ਤੱਤਾਂ ਨਾਲ ਮਿਲ ਜਾਂਦੇ ਹਨ ਜਿਵੇ-ਪਵਣੈ ਮਹਿ ਪਵਣ ਸਮਾਇਆ॥ਜੋਤੀ ਮਹਿ ਜੋਤਿ ਰਲ ਜਾਇਆ ਮਾਟੀ ਮਾਟੀ ਹੋਈ ਏਕ...॥(885) ਸਾਨੂੰ ਅਗਲੇ ਜਨਮ ਦੀਆਂ ਆਸਾਂ ਲਾ ਕੇ ਇਹ ਅਮੋਲਕ ਜਨਮ ਅਜਾਈਂ ਨਹੀਂ ਗਵਾਉਣਾ ਚਾਹੀਦਾ। ਨਰਕਾਂ ਦਾ ਡਰ ਅਤੇ ਸਵਰਗਾਂ ਦੇ ਸੁਖ ਦੇਣ ਦੇ ਲਾਰੇ ਲੌਣ ਵਾਲੇ ਪੰਡਤ, ਜੋਤਸ਼ੀ ਅਤੇ ਅਜੋਕੇ ਸਾਧ-ਸੰਤ ਲੋਕਾਈ ਨੂੰ ਲੁੱਟ ਰਹੇ ਹਨ। ਕਰਤੇ ਦੀ ਰਚਨਾ ਦਾ ਆਦਿ ਅੰਤ ਤਾਂ ਕਰਤਾ ਹੀ ਜਾਣਦਾ ਹੈ-ਨਾਨਕ ਕਰਤੇ ਕੀ ਜਾਨੈ ਕਰਤਾ ਰਚਨਾ॥(275) ਇਵੇਂ ਬਹੁਤੇ ਸਰੋਤਿਆਂ ਦੇ ਚਿਰਾਂ ਤੋਂ ਮਨ ਵਿੱਚ ਬੈਠਾਏ ਗਏ ਸ਼ੰਕਿਆਂ ਦਾ ਨਿਵਾਰਨ ਹੋਇਆ। ਇਸ ਸੈਮੀਨਾਰ ਵਿੱਚ ਧਾਰਮਿਕ ਟੀਚਰ, ਗੁਰਦੁਆਰੇ ਦੇ ਪ੍ਰਬੰਧਕ ਅਤੇ ਕੁਝ ਸਟਾਫ਼ ਵੀ ਸ਼ਾਮਲ ਹੋਇਆ। ਵਿਸ਼ੇਸ਼ ਕਰਕੇ ਸਿੱਖ ਸੈਂਟਰ ਸਿੰਘਾ ਪੁਰ ਦੇ ਚੇਅਰਮੈਨ ਸ੍ਰ. ਕ੍ਰਿਪਾਲ ਸਿੰਘ ਮੱਲ੍ਹੀ ਨੇ ਵੀ ਹਾਜ਼ਰੀ ਭਰੀ। 11-16-11 ਨੂੰ ਬੁਧੱਵਾਰ ਦੇ ਵਿਸ਼ੇਸ਼ ਪ੍ਰੋਗਰਾਮ ਵਿੱਚ ਗੁਰਦੁਆਰਾ ਸਿੱਖ ਸੈਂਟਰ ਵਿਖੇ ਭਰੇ ਦਿਵਾਨ ਵਿੱਚ "ਦੁੱਖ ਭੰਜਨ" ਵਿਸ਼ੇ ਤੇ ਪਹਿਲੇ ਭਾਈ ਅਵਤਾਰ ਸਿੰਘ ਖਾਲਸਾ ਨੇ ਕਥਾ ਕਰਦੇ ਦਰਸਾਇਆ ਕਿ ਦੁਨੀਆਵੀ ਅਤੇ ਆਤਮਿਕ ਦੋ ਤਰਾਂ ਦੇ ਦੁੱਖ ਹਨ, ਦੁਨੀਆਵੀ ਦੁੱਖ ਰੋਗ ਦੀ ਨਵਿਰਤੀ ਲਈ ਵੈਦ ਡਾਕਟਰ ਹਨ ਜਦ ਕਿ ਅੰਦਰੂਨੀ ਦੁੱਖਾਂ ਦੀ ਨਵਿਰਤੀ ਗੁਰੂ ਵੈਦ ਹੀ ਕਰ ਸਕਦਾ ਹੈ। ਹਰਸਿਮਰਤ ਕੌਰ ਨੇ ਵੀ "ਦੁੱਖ ਭੰਜਨ" ਸ਼ਬਦ ਦਾ ਕੀਰਤਨ ਕਰਦੇ ਕਿਹਾ ਕਿ ਸਾਰੀ ਗੁਰਬਾਣੀ ਹੀ ਦੁੱਖ ਭੰਜਨੀ ਹੈ ਸਾਨੂੰ ਦੁੱਖਾਂ ਦੀ ਨਵਿਰਤੀ ਲਈ ਭੇਖੀ ਸਾਧਾਂ ਕੋਲ ਨਹੀਂ ਜਾਣਾ ਚਾਹੀਦਾ, ਦੇਖੋ ਮੇਰੇ ਅੰਦਰੂਨੀ ਦੁੱਖ ਗੁਰਬਾਣੀ ਧਾਰਨ ਕਰਕੇ ਦੂਰ ਹੋ ਗਏ ਹਨ। ਮਾਲਕ ਨੂੰ ਭੁੱਲਣ ਤੇ ਹੀ ਦੁੱਖ ਰੋਗ ਲਗਦੇ ਹਨ-ਪ੍ਰਮੇਸ਼ਰ ਤੇ ਭੁਲਿਆਂ ਵਿਆਪਨ ਸਭੈ ਰੋਗ॥ ਵੀਰਵਾਰ ਨੂੰ "ਲੱਖ ਖੁਸ਼ੀਆਂ" ਵਿਸ਼ੇ ਤੇ ਸੈਮੀਨਾਰ ਕੀਤਾ ਗਿਆ। ਹਰਸਿਮਰਤ ਨੇ ਦੁਨੀਆਵੀ ਅਤੇ ਰੂਹਾਨੀ ਖੁਸ਼ੀਆਂ ਤੇ ਇੰਗਲਿਸ਼ ਵਿੱਚ ਚਾਨਣਾ ਪਾਇਆ। ਸੰਗਤਾਂ ਪ੍ਰਭਾਵਤ ਹੋ ਕੇ ਅੱਗੇ ਹੋਰ ਪ੍ਰੋਗਰਾਮ ਬੁੱਕ ਕਰਵਾ ਰਹੀਆਂ ਹਨ ਜਿਨ੍ਹਾਂ ਦਾ ਵੇਰਵਾ ਬਾਅਦ ਵਿੱਚ ਦਿੱਤਾ ਜਾਵੇਗਾ। ਸੰਗਤਾਂ ਵਿੱਚ ਗੁਰਬਾਣੀ ਸਿੱਖਣ ਦੀ ਜਗਿਆਸਾ ਪੈਦਾ ਹੋ ਰਹੀ ਹੈ। ਸਿੱਖ ਸੈਂਟਰ ਸਿੰਘਾਪੁਰ ਵਿਖੇ ਦੋ ਸਾਲਾ ਸਿੱਖ ਮਿਸ਼ਨਰੀ ਕੋਰਸ ਅਤੇ ਹੋਰ ਕਈ ਗੁਰਮਤਿ ਕੋਰਸ ਕਰਵਾਏ ਜਾਂਦੇ ਹਨ। ਇਸ ਦੇ ਨਾਲ ਹੀ ਸੰਗਤਾਂ ਗੁਰਬਾਣੀ ਦੀ ਸੰਥਿਆ ਅਤੇ ਗੁਰਬਾਣੀ ਵਿਆਕਰਣ ਦੀਆਂ ਕਲਾਸਾਂ ਵੀ ਬੜੇ ਉਤਸ਼ਾਹ ਨਾਲ ਲੈਂਦੀਆਂ ਹਨ। ਪ੍ਰੋæ ਜਸਵੰਤ ਸਿੰਘ ਸਿੰਘਾਪੁਰ ਗੁਰਮਤਿ ਅਤੇ ਗੁਰਬਾਣੀ ਸਿਖਲਾਈ ਦੀ ਸੇਵਾ ਬੜੇ ਸੁਚੱਜੇ ਢੰਗ ਨਾਲ ਨਿਭਾਅ ਰਹੇ ਹਨ। ਸਿੱਖ ਸੈਂਟਰ ਸਿੰਘਾਪੁਰ ਦੇ ਸੁਯੋਗ ਪ੍ਰਬੰਧਕਾਂ ਦਾ ਇਹ ਉਪਰਾਲਾ-ਗੁਰ ਪਰਸਾਦੀ ਵਿਦਿਆ ਵੀਚਾਰੈ ਪੜਿ ਪੜਿ ਪਾਵੈ ਮਾਨੁ॥(1329) ਵਾਲਾ ਹੈ।

ਭਾਈ ਅਵਤਾਰ ਸਿੰਘ ਅਤੇ ਬੀਬੀ ਹਰਸਿਮਰਤ ਕੌਰ ਖਾਲਸਾ

ਹਰਸਿਮਰਤ ਕੌਰ ਖਾਲਸਾ ਨੇ ਸਿੱਖ ਬੀਬੀਆਂ ਦੇ ਬਰਾਬਰੀ ਦੇ ਸਿਧਾਂਤ ਤੇ ਪਹਿਰਾ ਦਿੰਦੇ ਹੋਏ ਅਨੰਦ ਕਾਰਜਾਂ ਦੀ ਸੇਵਾ ਕੀਤੀ,

ਹਰਸਿਮਰਤ ਕੌਰ ਖਾਲਸਾ ਨੇ ਸਿੱਖ ਬੀਬੀਆਂ ਦੇ ਬਰਾਬਰੀ ਦੇ ਸਿਧਾਂਤ ਤੇ ਪਹਿਰਾ ਦਿੰਦੇ ਹੋਏ ਅਨੰਦ ਕਾਰਜਾਂ ਦੀ ਸੇਵਾ ਕੀਤੀ, ਪ੍ਰਬੰਧਕਾਂ ਅਤੇ ਪ੍ਰਵਾਰਾਂ ਨੇ ਵੀ ਪੂਰਾ ਸਾਥ ਦਿੱਤਾ



ਗਨੇਸ਼ ਨਗਰ (ਰਾਮਾਮੰਡੀ) ਜਲੰਧਰ ਦੇ ਰਹਿਣਵਾਲੇ ਭਾਈ ਦਿਲਾਵਰ ਸਿੰਘ ਦੀ ਲੜਕੀ ਅਤੇ ਅਵਤਾਰ ਸਿੰਘ ਮਿਸ਼ਨਰੀ ਦੀ ਭਤੀਜੀ ਬੀਬੀ ਅਮਰਜੀਤ ਕੌਰ ਅਤੇ ਕਾਕਾ ਸੁਖਵਿੰਦਰ ਸਿੰਘ ਸਪੁੱਤਰ ਸ੍ਰ ਅਮਰ ਸਿੰਘ ਸਮਾਨਾ ਜਿਨ੍ਹਾਂ ਦਾ ਅਨੰਦ ਕਾਰਜ 5 ਦਸੰਬਰ 2011 ਨੂੰ ਗੁਰਦੁਆਰਾ ਸਿੰਘ ਸਭਾ, ਕਾਕੀ ਪਿੰਡ (ਰਾਮਾਮੰਡੀ) ਜਲੰਧਰ ਕੈਂਟ ਵਿਖੇ ਹੋਇਆ। ਜਿੱਥੇ ਪ੍ਰਵਾਰ ਵੱਲੋਂ ਸਹਿਜ ਪਾਠ ਦੀ ਸਮਾਪਤੀ ਮਿਲ ਕੇ ਕੀਤੀ, ਭੋਗ ਦੇ ਸ਼ਲੋਕ, ਲਾਵਾਂ, ਸ਼ਬਦ ਕੀਰਤਨ, ਹੁਕਮਨਾਮਾ ਅਤੇ ਅਨੰਦ ਸਾਹਿਬ ਦੀ ਸੇਵਾ ਅਮਰੀਕਨ ਬੀਬੀ ਹਰਸਿਮਰਤ ਕੌਰ ਖਾਲਸਾ ਨੇ ਬਾਖੂਬੀ ਨਿਭਾ ਕੇ ਸਿੱਖ ਸੰਗਤਾਂ ਨੂੰ ਹੈਰਾਨ ਕਰ ਦਿੱਤਾ। ਸੰਗਤ ਨੇ ਜੈਕਾਰੇ ਬੁਲਾਏ ਅਤੇ ਸਥਾਨਕ ਪ੍ਰਬੰਧਕਾਂ ਨੇ ਬੀਬੀ ਹਰਸਿਮਰਤ ਕੌਰ ਖਾਲਸਾ ਅਤੇ ਭਾਈ ਅਵਤਾਰ ਸਿੰਘ ਮਿਸ਼ਨਰੀ ਨੂੰ ਗੁਰੂ ਬਖਸਿ਼ਸ਼ ਸਰੋੇਪੇ ਨਾਲ ਸਨਮਾਨਤ ਕੀਤਾ। ਇਸ ਦੇ ਦੋ ਦਿਨ ਬਾਅਦ 9 ਦਸੰਬਰ 2011 ਨੂੰ ਮਰਹੂਮ ਸ.੍ਰ ਬਚਿੱਤ੍ਰ ਸਿੰਘ ਤੇ ਬੀਬੀ ਜੋਗਿੰਦਰ ਕੌਰ ਦੇ ਹੋਣਹਾਰ ਸਪੁੱਤਰ ਕਾਕਾ ਗੁਰਸੇਵਕ ਸਿੰਘ ਪਿੰਡ ਬਿੰਦਰਖ ਦੇ ਅਨੰਦ ਕਾਰਜ ਦੀ ਖੁਸ਼ੀ ਵਿੱਚ ਅਖੰਡ ਪਾਠ ਦੇ ਭੋਗ ਤੇ ਬੀਬੀ ਹਰਸਿਮਰਤ ਕੌਰ ਖਾਲਸਾ ਨੇ ਕੀਰਤਨ ਵਖਿਆਨ ਕੀਤਾ ਜੋ ਪਿੰਡ ਦੇ ਪਤਵੰਤੇ ਆਗੂਆਂ ਕੈਪਟਨ ਸ੍ਰ ਗੁਰਮੇਲ ਸਿੰਘ ਅਤੇ ਸ੍ਰ. ਬਹਾਦਰ ਸਿੰਘ ਜੀ ਨੇ ਬਹੁਤ ਹੀ ਪਸੰਦ ਕੀਤਾ ਅਤੇ ਪਿੰਡ ਦੇ ਇਤਿਹਾਸਕ ਗੁਰਦੁਆਰੇ, ਜਿਸ ਨੂੰ ਗੁਰੂ ਗੋਗਿੰਦ ਸਿੰਘ ਜੀ ਦੀ ਚਰਨ ਸ਼ੋਅ ਪ੍ਰਾਪਤ ਹੈ ਅਤੇ ਪ੍ਰਸਿੱਧ ਗਵੀਏ ਮਰਹੂਮ ਸਰਜੀਤ ਸਿੰਘ ਬਿੰਦਰੱਖੀਏ ਦਾ ਪਿੰਡ ਹੈ, ਜਿੱਥੇ ਹਰ ਐਤਵਾਰ ਹਜਾਰਾਂ ਸੰਗਤਾਂ ਹਾਜਰੀ ਭਰਦੀਆਂ ਹਨ ਵਿਖੇ ਵੀ ਪੂਰੇ ਦਾ ਪੂਰਾ ਦੀਵਾਨ ਸਾਨੂੰ ਕਥਾ ਕੀਰਤਨ ਪ੍ਰਚਾਰ ਲਈ ਅਡਵਾਂਸ ਬੁੱਕ ਕਰ ਲਿਆ। ਅਗਲੇ ਦਿਨ ਬਰਾਤ ਮੋਰਿੰਡਾ ਵਿਖੇ ਗਈ, ਜਿੱਥੇ ਸਥਾਨਕ ਗੁਰਦੁਆਰੇ ਸਿੰਘ ਸਭਾ ਵਿਖੇ ਕਾਕਾ ਗੁਰਸੇਵਕ ਸਿੰਘ ਅਤੇ ਬੀਬੀ ਗੁਰਜੀਤ ਕੌਰ ਦਾ ਅਨੰਦ ਕਾਰਜ ਹੋਇਆ, ਜਿੱਥੇ ਵੀ ਬੀਬੀ ਹਰਸਿਮਰਤ ਕੌਰ ਖਾਲਸਾ ਨੇ ਲਾਵਾਂ ਦੀ ਸੇਵਾ ਕੀਤੀ ਅਤੇ ਹੁਕਮਨਾਮਾਂ ਲਿਆ। ਇੱਥੋਂ ਦੀ ਕਮੇਟੀ ਬਹੁਤ ਹੀ ਪ੍ਰਭਾਵਤ ਹੋਈ ਅਤੇ ਬੀਬੀ ਖਾਲਸਾ ਨੂੰ ਸਿਰੋਪਾਓ ਦੇ ਸਨਮਾਣਿਤ ਕੀਤਾ। ਇੱਥੇ ਪ੍ਰਬੰਧਕਾਂ ਅਤੇ ਸੰਗਤਾਂ ਨੇ ਬਹੁਤ ਵਧੀਆ ਰੀਤ ਚਲਾਈ ਹੋਈ ਕਿ ਜੋ ਵੀ ਬੱਚੇ ਗੁਰਸਿੱਖ ਅੰਮ੍ਰਿਤਧਾਰੀ ਹੋਣਗੇ ਉਨ੍ਹਾਂ ਦੇ ਅਨੰਦ ਕਾਰਜ ਫਰੀ ਹੋਣਗੇ ਅਤੇ 1100/- ਰੁਪਏ ਨਾਲ ਸਨਮਾਨਤ ਕੀਤਾ ਜਾਂਦਾ ਹੈ। ਪ੍ਰਬੰਧਕ ਕਮੇਟੀ ਨੇ ਸਟੇਜ ਤੋਂ ਕਿਹਾ ਕਿ ਹੁਣ ਉਹ ਦਿਨ ਦੂਰ ਨਹੀਂ ਜਦ ਵਿਦੇਸ਼ੀ ਸਿੱਖਾਂ ਦੇ ਉਦਮ ਸਦਕਾ ਬੀਬੀਆਂ ਵੀ ਸ੍ਰੀ ਦਰਬਾਰ ਸਾਹਿਬ ਅੰਮ੍ਰਿਤਸਰ ਵਿਖੇ ਗੁਰਬਾਣੀ ਦਾ ਇਲਾਹੀ ਕੀਰਤਨ ਕਰਿਆ ਕਰਨਗੀਆਂ। ਅਸੀਂ ਦੋਨੋਂ ਹੀ ਅਨੰਦ ਕਾਰਜ ਵਾਲੇ ਪ੍ਰਵਾਰਾਂ ਅਤੇ ਗੁਰਦੁਆਰਾ ਪ੍ਰਬੰਧਕ ਕਮੇਟੀਆਂ ਦੇ ਤਹਿ ਦਿਲੋਂ ਧੰਨਵਾਦੀ ਹਾਂ ਜਿਨ੍ਹਾਂ ਨੇ ਗੁਰਮਤਿ ਸਿਧਾਤਾਂ ਨੂੰ ਪਹਿਲ ਦਿੱਤੀ ਹੈ।

ਗੁਰੂ ਗ੍ਰੰਥ ਪ੍ਰਚਾਰ ਮਿਸ਼ਨ ਵੱਲੋਂ ਮਲੇਸ਼ੀਆ ਦੇ ਗੁਰਦਵਾਰਾ ਸਾਹਿਬ ਜੌਹਰ ਬਾਰੂ ਵਿਖੇ ਗੁਰਮਤਿ ਪ੍ਰਚਾਰ

ਗੁਰੂ ਗ੍ਰੰਥ ਪ੍ਰਚਾਰ ਮਿਸ਼ਨ ਵੱਲੋਂ ਮਲੇਸ਼ੀਆ ਦੇ ਗੁਰਦਵਾਰਾ ਸਾਹਿਬ ਜੌਹਰ ਬਾਰੂ ਵਿਖੇ ਗੁਰਮਤਿ ਪ੍ਰਚਾਰ
ਪ੍ਰੋ. ਜਸਵੰਤ ਸਿੰਘ ਸਿੰਘਾਪੁਰ ਰਾਹੀਂ, ਡਾ. ਦਇਆ ਸਿੰਘ ਮੁੱਖ ਅਧਿਆਪਕ ਪੰਜਾਬੀ ਸਕੂਲ ਜੌਹਰ ਬਾਰੂ ਦੇ ਉਦਮ ਸਦਕਾ ਗੁਰਦੁਆਰਾ ਸਾਹਿਬ ਜੌਹਰ ਬਾਰੂ ਦੇ ਪ੍ਰਬੰਧਕਾਂ ਅਤੇ ਇਸਤਰੀ ਸਤਸੰਗ ਜੌਹਰ ਬਾਰੂ ਨਾਲ ਸਲਾਹ ਕਰਕੇ ਤਿੰਨ ਦਿਨ ਦਾ ਗੁਰਮਤਿ ਪ੍ਰਚਾਰ ਪ੍ਰੋਗਰਾਮ ਉਲੀਕਿਆ ਗਿਆ। ਡਾ. ਦਇਆ ਸਿੰਘ ਜੀ ਨੇ ਇੰਨਟ੍ਰਨੈੱਟ ਤੋਂ ਭਾ. ਅਵਤਾਰ ਸਿੰਘ ਮਿਸ਼ਨਰੀ ਅਤੇ ਬੀਬੀ ਹਰਸਿਮਰਤ ਕੌਰ ਖਾਲਸਾ ਦੀਆਂ ਫੋਟੋਆਂ ਲੈ ਕੇ ਪ੍ਰੋਗਰਾਮਾਂ ਦੇ ਵੇਰਵੇ ਦਾ ਇਸ਼ਤਿਹਾਰ ਗੁਰਦੁਆਰਿਆਂ ਵਿੱਚ ਲਗਾ ਦਿੱਤਾ। ਤਿੰਨੇ ਦਿਨ ਗੁਰੂ ਗ੍ਰੰਥ ਪ੍ਰਚਾਰ ਮਿਸ਼ਨ ਦੇ ਜਥੇ ਨੂੰ ਖੁਲ੍ਹਾ ਸਮਾਂ ਦਿੱਤਾ ਗਿਆ। ਪਹਿਲੇ ਦਿਨ ਬੱਚੀ ਦਾ ਜਨਮ ਦਿਨ ਹੋਣ ਕਰਕੇ “ਪੂਤਾ ਮਾਤਾ ਕੀ ਅਸੀਸ” ਦੇ ਅਧਾਰਤ ਕੀਰਤਨ ਅਤੇ ਵਿਚਾਰ ਕੀਤਾ ਗਿਆ। ਭਾਈ ਅਵਤਾਰ ਸਿੰਘ ਨੇ ਦਰਸਾਇਆ ਕਿ ਸਿੱਖ ਧਰਮ ਵਿੱਚ ਪੁੱਤਰ ਧੀਆਂ ਬਰਾਬਰ ਹਨ ਅਤੇ ਇਸ ਸ਼ਬਦ ਵਿੱਚ ਗੁਰੂ ਮਾਤਾ ਵੱਲੋਂ ਸਿੱਖ ਰੂਪ ਬੱਚੇ ਨੂੰ ਇਹ ਅਸੀਸ ਦਿੱਤੀ ਗਈ ਹੈ ਕਿ ਹੇ ਬੱਚੇ ਤੈਨੂੰ ਨਿਮਖ ਮਾਤਰ ਵੀ ਪਿਤਾ ਪ੍ਰਮਾਤਮਾਂ ਨਾਂ ਭੁੱਲੇ ਅਤੇ ਤੁਸੀਂ ਸਦਾ ਉਸ ਨੂੰ ਯਾਦ ਰੱਖੋ। ਭਾਈ ਸਾਹਿਬ ਨੇ ਇਹ ਵੀ ਸਮਝਾਇਆ ਕਿ ਪੁਰਾਤਨ ਮਾਵਾਂ ਬੱਚਿਆਂ ਨੂੰ ਅਜਿਹੀਆਂ ਲੋਰੀਆਂ ਦਿੰਦੇ ਹੋਏ ਗੁਰਮਤਿ ਦੀ ਸਿਖਿਆ ਦਿਆ ਕਰਦੀਆਂ ਸਨ। ਬੀਬੀ ਹਰਸਿਮਰਤ ਕੌਰ ਖਾਲਸਾ ਨੇ ਬਾਖੂਬੀ ਇਸ ਦੀ ਇੰਗਲਿਸ਼ ਵਿੱਚ ਵਿਆਖਿਆ ਕੀਤੀ ਜਿਸ ਨੂੰ ਸੰਗਤ ਅਤੇ ਬੱਚਿਆਂ ਨੇ ਖਾਮੋਸ਼ ਹੋ ਕੇ ਸੁਣਿਆਂ ਕਿਉਂਕਿ ਇੱਥੇ ਬਹੁਤੀ ਸੰਗਤ ਅਤੇ ਬੱਚੇ ਅੰਗ੍ਰੇਜੀ ਵੱਧ ਸਮਝਦੇ ਹਨ। ਸੰਗਤ ਕਹਿ ਰਹੀ ਸੀ ਕਿ ਪਹਿਲੇ ਤਾਂ ਬੱਚੇ ਦੀਵਾਨ ਵਿੱਚ ਸ਼ੋਰ ਕਰਦੇ ਸਨ ਅਤੇ ਉੱਠ ਕੇ ਵੀ ਚਲੇ ਜਾਂਦੇ ਸਨ ਪਰ ਅੱਜ ਪੂਰਾ ਘੰਟਾ ਟਿਕ ਕੇ ਬੈਠੇ ਰਹੇ ਹਨ।
ਅਗਲੇ ਦਿਨ ਸ਼ਾਮ ਦੇ ਦੀਵਾਨ ਵਿੱਚ ਨਾਮ ਸਿਮਰਨ ਤੇ ਕੀਰਤਨ ਵਖਿਆਨ ਕਰਦੇ ਹੋਏ ਭਾਈ ਸਾਹਿਬ ਅਤੇ ਬੀਬਾ ਜੀ ਨੇ ਦੱਸਿਆ ਕਿ ਇੱਕ ਅਕਾਲ ਪੁਰਖ ਦਾ ਸਿਮਰਨ ਸਾਨੂੰ ਹਰਵੇਲੇ “ਊਠਤ ਬੈਠਤ ਸੋਵਤ ਨਾਮ” ਕਰਨਾ ਚਾਹੀਦਾ ਹੈ ਨਾਂ ਕਿ ਕਿਸੇ ਸਾਧ ਸੰਤ ਦੇ ਦੱਸੇ ਕਿਸੇ ਖਾਸ ਸਮੇਂ ਤੇ, ਨਾਮ ਸਿਮਰਨ ਦੀ ਵਿਧੀ ਵੀ ਗੁਰੂ ਗ੍ਰੰਥ ਸਾਹਿਬ ਵਿੱਚੋਂ ਸਮਝਾਈ ਕਿ ਜਿਵੇਂ ਬੱਚੇ ਦਾ ਧਿਆਨ ਡੋਰ, ਸੁਨਿਆਰੇ ਦਾ ਘਾੜਤ, ਪਾਣੀ ਦੇ ਘੜੇ ਲੈ ਜਾ ਰਹੀਆਂ ਬੀਬੀਆਂ ਦਾ ਘੜਿਆਂ, ਪੰਜ ਕੋਹ ਤੇ ਚਰ ਰਹੀ ਗਾਂ ਦਾ ਵੱਛੇ ਅਤੇ ਪੰਘੂੜੇ ਵਿੱਚ ਪਏ ਬੱਚੇ ਦੀ ਮਾਂ ਦਾ ਕਾਰੋ ਬਾਰ ਕਰਦਿਆਂ ਬੱਚੇ ਵੱਲ ਰਹਿੰਦਾ ਹੈ। ਇਵੇਂ ਹੀ ਕਿਰਤ ਕਮਾਈ ਕਰਦੇ ਹੋਏ ਸਾਡਾ ਧਿਆਨ ਮੋਹ ਮਾਇਆ ਤੋਂ ਉੱਪਰ ਉੱਠ ਕੇ, ਹੱਥ ਕਾਰ ਵੱਲ ਅਤੇ ਚਿੱਤ ਯਾਰ ਵੱਲ ਹੋਣਾ ਚਾਹੀਦਾ ਹੈ, ਨਾਂ ਕਿ ਕਿਸੇ ਇੱਕ ਸ਼ਬਦ ਦਾ ਵਾਰ-2 ਗਿਣਤੀ ਕਰਕੇ ਜਾਪ ਕਰਨਾ।
ਇਸ ਤੋਂ ਅਗਲੇ ਦਿਨ ਜੌਹਰ ਬਾਰੂ ਦੇ ਸੁਲਤਾਨ ਇਬਰਾਹਿਮ ਦਾ ਜਨਮ ਦਿਨ ਸੀ ਇਥੇ ਹਰ ਸਾਲ ਸੁਲਤਾਨ ਦੇ ਜਨਮ ਦਿਨ ਤੇ ਛੁੱਟੀ ਹੁੰਦੀ ਹੈ। ਜਿੱਥੇ ਬਾਕੀ ਲੋਕ ਘਰ ਬਾਰਾਂ ਅਤੇ ਬਜਾਰਾਂ ਦੀ ਸਜਾਵਟ ਕਰਕੇ ਆਪੋ ਆਪਣੇ ਘਰਾਂ, ਸਮਾਜਿਕ ਅਤੇ ਧਾਰਮਿਕ ਥਾਵਾਂ ਤੇ ਸੁਲਤਾਨ ਦਾ ਜਨਮ ਦਿਨ ਮਨਾਉਂਦੇ ਹਨ ਓਥੇ ਸਿੱਖ ਸੰਗਤਾਂ ਗੁਰਦੁਆਰੇ ਇਕੱਠੇ ਹੋ ਗੁਰਬਾਣੀ ਦਾ ਪਾਠ, ਕੀਰਤਨ ਅਤੇ ਕਥਾ ਕਰਕੇ ਮਨਾਉਂਦੀ ਹੋਈ ਆਪਣੇ ਹਰਮਨ ਪਿਆਰੇ ਸੁਲਤਾਨ ਦੀ ਲੰਬੀ ਉਮਰ, ਤੰਦਰੁਸਤੀ ਅਤੇ ਚੜ੍ਹਦੀ ਕਲਾ ਦੀ ਅਰਦਾਸ ਕਰਦੀ ਹੈ। ਭਾਈ ਸਾਹਿਬ ਨੇ ਵੀ ਗੁਰਬਾਣੀ ਚੋਂ ਹਵਾਲੇ ਦੇ ਕੇ “ਤੂੰ ਸੁਲਤਾਨ ਕਹਾਂ ਹਊਂ ਮੀਆਂ ਅਤੇ ਕਿਆ ਸੁਲਤਾਨ ਸਲਾਮ ਵਿਹੂਣਾਂ” ਦੀ ਵਿਆਖਿਆ ਕਰਕੇ ਦੱਸਿਆ ਕਿ ਅਸਲ ਵਿੱਚ ਅੱਲ੍ਹਾ ਤਾਲਾ, ਰਾਮ, ਰਹੀਮ, ਅਕਾਲ ਪੁਰਖ, ਗਾਡ ਹੀ ਸਭ ਦਾ ਸੁਲਤਾਨ ਹੈ ਜਿਸ ਦਾ ਜਨਮ ਹਰ ਵੇਲੇ ਹੈ ਭਾਵ ਉਹ ਸਦਾ ਹੀ ਨੀਤ ਨਵਾਂ ਹੈ “ਸਾਹਿਬ ਮੇਰਾ ਨੀਤ ਨਵਾਂ ਸਦਾ ਸਦਾ ਦਾਸਤਾਰ” ਭਾਈ ਸਾਹਿਬ ਨੇ ਇਹ ਵੀ ਪ੍ਰੇਰਨਾਂ ਕੀਤੀ ਜਿਵੇਂ ਇੱਥੇ ਮੁਸਲਿਮ ਭਾਈਆਂ ਦੇ ਬੱਚੇ ਪੰਜ ਦਿਨ ਸਕੂਲ ਤੋਂ ਬਾਅਦ ਦੋ ਘੰਟੇ ਮਦਰੱਸੇ ਵਿੱਚ ਧਰਮ ਵਿਦਿਆ ਸਿਖਦੇ ਹਨ ਇਵੇਂ ਹੀ ਤੁਸੀਂ ਵੀ ਆਪਣੇ ਬੱਚਿਆਂ ਨੂੰ ਸਕੂਲ ਤੋਂ ਬਾਅਦ ਧਰਮ ਵਿਦਿਆ ਗੁਰਬਾਣੀ ਇਤਿਹਾਸ ਦੀ ਕਲਾਸ ਲਗਾਇਆ ਕਰੋ ਤਾਂ ਕਿ ਤੁਹਾਡੇ ਬੱਚੇ ਵੀ ਧਰਮ ਵਿਦਿਆ ਸਿੱਖ ਕੇ ਗੁਰਸਿੱਖ ਬਣ ਸਕਣ। ਹਰਸਿਮਰਤ ਨੇ ਜਿੱਥੇ “ਦੁਖ ਭੰਜਨ ਤੇਰਾ ਨਾਮ” ਦਾ ਰਸ ਭਿੰਨਾ ਕੀਰਤਨ ਕੀਤਾ ਓਥੇ ਗੁਰਬਾਣੀ ਨਾਮ ਨੂੰ ਹੀ ਦੁੱਖਾਂ ਦਾ ਦਾਰੂ ਦਰਸਾਉਂਦਿਆਂ ਦੱਸਿਆ ਕਿ ਸਰੀਰਕ ਦੁੱਖ ਡਾਕਟਰ ਵੈਦ ਕੋਲੋਂ ਦਵਾਈ ਲੈ ਕੇ ਪ੍ਰਹੇਜ ਨਾਲ ਖਾਣ ਤੇ ਦੂਰ ਹੁੰਦੇ ਹਨ ਅਤੇ ਮਾਨਸਕ ਦੁੱਖ ਰੋਗ ਗੁਰੂ ਵੈਦ ਦੀ ਸਿਖਿਆ ਰੂਪ ਬਾਣੀ ਤੇ ਅਮਲ ਕਰਨ ਨਾਲ ਨਸਦੇ ਹਨ। ਸਾਨੂੰ ਗੁਰੂ ਵੈਦ ਨੂੰ ਛੱਡ ਕੇ ਨੀਮ ਹਕੀਮਾਂ ਰੂਪੀ ਪਾਖੰਡੀ ਸਾਧਾਂ ਦੇ ਡੇਰਿਆਂ ਤੇ ਨਹੀਂ ਜਾਣਾ ਚਾਹੀਦਾ ਉਹ ਤਾਂ ਸਗੋਂ ਵਹਿਮਾਂ ਭਰਮਾਂ ਦੇ ਹੋਰ ਰੋਗ ਲਾ ਦਿੰਦੇ ਹਨ। ਗੁਰਮਤਿ ਦੇ ਨਿਰੋਲ ਪ੍ਰਚਾਰ ਨੂੰ ਲਾਈਕ ਕਰਕੇ ਜਿੱਥੇ ਪ੍ਰਬੰਧਕਾਂ ਨੇ ਬਹੁਤ ਸੰਨਮਾਨ ਕੀਤਾਂ ਓਥੇ ਦੁਪਹਿਰ ਦੇ ਇਸਤਰੀ ਸਤਸੰਗ ਦੀਵਾਨ ਵਿੱਚ ਵੀ ਸੁਖਮਨੀ ਸਾਹਿਬ ਤੋਂ ਬਾਅਦ ਆਪਣਾ ਸਾਰਾ ਸਮਾਂ ਬੀਬੀਆਂ ਨੇ ਬੀਬੀ ਹਰਸਿਮਰਤ ਕੌਰ ਅਤੇ ਭਾਈ ਅਵਤਾਰ ਸਿੰਘ ਨੂੰ ਹੀ ਦੇ ਦਿੱਤਾ ਜਿਸ ਵਿੱਚ ਬੱਚੇ ਦੇ ਜਨਮ ਦਿਨ ਦੇ ਨਾਲ ਨਾਲ ਭਾਈ ਸਾਹਿਬ ਅਤੇ ਬੀਬਾ ਜੀ ਨੇ ਇਸਤਰੀਆਂ ਦੇ ਬਰਾਬਰ ਦੇ ਹੱਕਾਂ ਤੇ ਕਥਾ ਵਖਿਆਣ ਕਰਦਿਆਂ ਦਰਸਾਇਆ ਕਿ ਸਿੱਖ ਧਰਮ ਵਿੱਚ ਮਰਦ ਅਤੇ ਔਰਤਾਂ ਬਾਰਬਰ ਹਨ। ਹਰ ਧਰਮ ਕਰਮ ਵਿੱਚ ਬੀਬੀਆਂ ਵੀ ਬਰਾਬਰ ਹਿੱਸੇਦਾਰ ਹਨ। ਲੰਬਾ ਸਮਾਂ ਸਾਨੂੰ ਬ੍ਰਾਹਮਣੀ ਸਮਾਜ ਵਿੱਚ ਰਹਿਣ ਕਰਕੇ ਅਸੀਂ ਕਈ ਬ੍ਰਾਹਮਣੀ ਰਹੁ ਰੀਤਾਂ ਅਪਣਾਅ ਲਈਆਂ ਹਨ। ਸਾਡੇ ਧਰਮ ਦੇ ਮੋਢੀ ਬਾਬਾ ਨਾਨਕ ਜੀ ਨੇ ਤਾਂ ਬੁਲੰਦ ਬਾਂਗ ਕਹਿ ਦਿੱਤਾ ਸੀ “ਸੋ ਕਿਉਂ ਮੰਦਾ ਆਖੀਐ ਜਿਤਿ ਜੰਮੈ ਰਾਜਾਨ” ਨਾਲੇ ਜੋ ਸਿਖਿਆ ਮਾਵਾਂ ਬੀਬੀਆਂ ਬੱਚਿਆਂ ਨੂੰ ਦੇ ਸਕਦੀਆਂ ਹਨ ਪਿਤਾ ਪੁਰਖ ਨਹੀਂ ਦੇ ਸਕਦੇ। ਬੀਬੀ ਹਰਸਿਮਰਤ ਕੌਰ ਨੇ ਵਿਅੰਗ ਵਿੱਚ ਕਿਹਾ ਕਿ ਜੇ ਮੈਂ ਗੋਰੀ ਹੋ ਕੇ ਗੁਰਬਾਣੀ ਪੜ੍ਹ, ਗਾ ਅਤੇ ਵਿਚਾਰ ਸਕਦੀ ਹਾਂ ਤੁਸੀਂ ਕਿਉਂ ਨਹੀਂ ਤੁਹਾਡੀ ਤਾਂ ਮਾਂ ਬੋਲੀ ਪੰਜਾਬੀ ਹੈ। ਇਸ ਤਕਰੀਰ ਦਾ ਬੀਬੀਆਂ ਤੇ ਇਨਾਂ ਅਸਰ ਹੋਇਆ ਕਿ ਉਨ੍ਹਾਂ ਨੇ ਅਰਾਦਸ ਤੋਂ ਬਾਅਦ ਗੁਰੂ ਗ੍ਰੰਥ ਪ੍ਰਚਾਰ ਮਿਸ਼ਨ ਦੇ ਜਥੇ ਦਾ ਜਿੱਥੇ ਬੇਹੱਦ ਮਾਨ ਤਾਨ ਸਿਰੋਪਾ ਦੇ ਕੇ ਕੀਤਾ ਓਥੇ ਸੰਗਤ ਵਿੱਚ ਪ੍ਰਣ ਕੀਤਾ ਕਿ ਅੱਗੇ ਤੋਂ ਅਸੀਂ ਨਿਰਾ ਸੁਖਮਨੀ ਦਾ ਪਾਠ ਹੀ ਨਹੀਂ ਕਰਾਂਗੀਆਂ ਸਗੋਂ ਹਰ ਅਸ਼ਟਪਦੀ ਦੇ ਇੱਕ ਇੱਕ ਬੰਦ ਦੀ ਵਿਆਖਿਆ ਵੀ ਕਰਿਆ ਕਰਾਂਗੀਆਂ। ਡਾ. ਦਇਆ ਸਿੰਘ ਜੀ ਕੋਲੋਂ ਇਹ ਵੀ ਪਤਾ ਲੱਗਿਆ ਕਿ ਇੱਥੇ ਕੁੱਝ ਭਾਈ ਅਤੇ ਬੀਬੀਆਂ ਡਾਕ ਰਾਹੀਂਸਿੱਖ ਮਿਸ਼ਨਰ ਕੋਰਸ ਵੀ ਕਰ ਰਹੇ ਹਨ।
ਪ੍ਰਬੰਧਕਾਂ ਅਤੇ ਬੀਬੀਆਂ ਨੇ ਹੋਰ ਰੁਕਣ ਲਈ ਕਿਹਾ ਪਰ ਸਾਡੇ ਕੋਲ ਸਮਾਂ ਨਾਂ ਹੋਣ ਕਰਕੇ ਇਹ ਵਾਧਾ ਕੀਤਾ ਕਿ ਅੱਗੇ ਤੋਂ ਜਦੋਂ ਵੀ ਸਮਾਂ ਮਿਲਿਆ ਖੁੱਲ੍ਹਾਂ ਸਮਾਂ ਪ੍ਰਚਾਰ ਸੇਵਾ ਕਰਾਂਗੇ। ਤਿੰਨੇ ਦਿਨ ਲੰਗਰ ਅਤੁੱਟ ਵਰਤਿਆ। ਡਾ. ਦਇਆ ਸਿੰਘ ਸੋਢੀ ਅਤੇ ਉਨ੍ਹਾਂ ਦੇ ਪ੍ਰਵਾਰ ਨੇ ਸਾਨੂੰ ਸਿੰਘਾਪੁਰ ਤੋਂ ਮਲੇਸ਼ੀਆ ਲੈ ਜਾਣ, ਆਪਣੇ ਘਰ ਵਿਖੇ ਰਹਾਇਸ਼ ਅਤੇ ਲੰਗਰ ਪਾਣੀ ਦੀ ਪ੍ਰਵਾਰ ਵਾਂਗ ਸੇਵਾਕਰਨ ਅਤੇ ਵਾਪਸ ਸਿੰਘਾਪੁਰ ਛੱਡਣ ਦੀ ਸੇਵਾ ਬੜੇ ਉਤਸ਼ਾਹ ਨਾਲ ਕੀਤੀ। ਅਸੀਂ ਅਰਦਾਸ ਕਰਦੇ ਹਾਂ ਕਿ ਅਕਾਲ ਪੁਰਖ ਇਸ ਗੁਰਮੁਖ ਪ੍ਰਵਾਰ ਨੂੰ ਸਦਾ ਚੜ੍ਹਦੀਆਂ ਕਲਾਂ ਬਖਸ਼ੇ।

ਬੀਬੀ ਰਾਜਵਿੰਦਰ ਕੌਰ ਛਿਹਰਟਾ ਦੀ ਗੁਰਸਿੱਖੀ ਪ੍ਰੇਮ ਦੀ ਖਿੱਚ

ਅਸੀਂ ਸ੍ਰੀ ਦਰਬਾਰ ਸਾਹਿਬ ਅੰਮ੍ਰਿਤਸਰ ਦੇ ਦਰਸ਼ਨ ਕੀਤੇ ਅਤੇ ਲਿਖਾਰੀ-ਪ੍ਰਚਾਰਕ ਭੈਣ ਬੀਬੀ ਰਾਜਵਿੰਦਰ ਕੌਰ ਛਿਹਰਟਾ ਦੀ ਗੁਰਸਿੱਖੀ ਪ੍ਰੇਮ ਦੀ ਖਿੱਚ ਛਿਹਰਟਾ ਲੈ ਗਈ
ਅਸੀਂ ਪੰਜਾਬ ਜਲੰਧਰ ਪਹੁੰਚੇ ਅਤੇ ਸ੍ਰੀ ਦਰਬਾਰ ਸਾਹਿਬ ਅੰਮ੍ਰਿਤਸਰ ਦਰਸ਼ਨਾਂ ਨੂੰ ਗਏ। ਦਰਸ਼ਨੀ ਡਿਉੜੀ ਰਾਹੀ ਦਾਖਲ ਹੋ ਕੇ ਨਤ ਮਸਤਕ ਹੋਏ। ਦਰਬਾਰ ਸਾਹਿਬ ਕਾਫੀ ਰੌਣਕ ਸੀ। ਲੋਕ ਸਰੋਵਰ ਵਿੱਚ ਇਸ਼ਨਾਨ ਕਰ ਅਤੇ ਥਾਂ ਥਾਂ ਤੇ ਰੱਖੇ ਪਾਠਾਂ ਅਤੇ ਬੇਰੀਆਂ ਨੂੰ ਮੱਥੇ ਟੇਕ ਰਹੇ ਸਨ। ਹਰਸਿਮਰਤ ਕੌਰ ਖਾਲਸਾ ਹੈਰਾਨ ਹੋ ਕੇ ਪੁੱਛ ਰਹੀ ਸੀ ਸਿੱਖਾਂ ਦੇ ਕੇਂਦਰੀ ਅਸਥਾਨ ਤੇ ਇਹ ਕੀ ਹੋ ਰਿਹਾ ਹੈ? ਕੀ ਸਿੱਖਾਂ ਦਾ ਗੁਰੂ ਬੇਰੀਆਂ ਹਨ ਜਾਂ ਗੁਰੂ ਗ੍ਰੰਥ ਸਾਹਿਬ? ਲੋਕਾਂ ਦਾ ਧਿਆਨ ਖਿਚਣ ਲਈ ਹਰਸਿਮਰਤ ਨੇ ਗਤਕੇ ਕਾ ਪੈਂਤੜਾ ਲਿਆ ਤਾਂ ਲੋਕਾਂ ਦੀ ਭੀੜ ਇਕੱਠੀ ਹੋ ਗਈ। ਬੀਬੀ ਜੀ ਨੇ ਟੁੱਟੀ ਫੁੱਟੀ ਪੰਜਾਬੀ ਅਤੇ ਅੰਗ੍ਰੇਜੀ ਵਿੱਚ ਮਿਕਸ ਬੋਲਦਿਆਂ ਸ਼ਬਦ ਗੁਰੂ ਦੀ ਮਹਾਨਤਾ ਸਮਝਾਈ। ਲੋਕ ਹੈਰਾਨ ਹੋ ਰਹੇ ਸਨ ਕਿ ਇੱਕ ਗੋਰੀ ਨੂੰ ਗੁਰਬਾਣੀ ਦਾ ਕਿਨ੍ਹਾਂ ਗਿਆਨ ਹੈ। ਹਰਸਿਮਰਤ ਕਹਿ ਰਹੀ ਸੀ ਕਿ ਤੁਹਾਡੇ ਧਰਮ ਆਗੂਆਂ ਨੇ ਤੁਹਾਨੂੰ ਇਹ ਵੀ ਸਿਖਿਆ ਨਹੀਂ ਦਿੱਤੀ ਕਿ ਗੁਰਦੁਆਰਾ ਸਾਹਿਬ ਜਾ ਕੇ ਕਿਸ ਨੂੰ ਮੱਥਾ ਟੇਕਣਾ ਹੈ। ਕਈ ਕਹਿੰਦੇ ਸਾਡੇ ਸੰਤਾਂ ਨੇ ਸਾਨੂੰ ਇਹ ਸਿਖਿਆ ਦਿੱਤੀ ਹੈ ਕਿ ਐਨੀ ਵਾਰ ਸਰੋਵਰ ਵਿੱਚ ਇਸ਼ਨਾਨ ਕਰੋ, ਐਨੀਆਂ ਪ੍ਰਕਰਮਾਂ ਕਰੋ ਅਤੇ ਗੁਰੂ ਕੀਆਂ ਬੇਰੀਆਂ ਅਤੇ ਥੱੜਿਆਂ ਨੂੰ ਮੱਥਾ ਟੇਕੋ ਤੁਹਾਨੂੰ ਦੁੱਧਾਂ-ਪੁੱਤਾਂ ਦੀਆਂ ਦਾਤਾਂ ਮਿਲਣਗੀਆਂ ਅਤੇ ਦੁੱਖ ਦੂਰ ਹੋਣਗੇ। ਦਾਸ ਨੇ ਵੀ ਇਕੱਠੇ ਹੋਏ ਲੋਕਾਂ ਨੂੰ ਕਿਹਾ ਕਿ ਜੇ ਇੱਕ ਗੋਰੀ ਗੁਰਬਾਣੀ ਸਿੱਖ ਸਕਦੀ ਹੈ ਤਾਂ ਤੁਸੀਂ ਕਿਉਂ ਨਹੀਂ? ਛੱਡੋ ਪਾਖੰਡੀ ਸਾਧਾਂ ਦੇ ਪਾਏ ਹੋਏ ਭਰਮ, ਗੁਰੂ ਦਰਬਾਰ ਵਿੱਚ ਤਾਂ ਵਹਿਮ ਭਰਮ ਕੱਟੇ ਜਾਂਦੇ ਹਨ।
ਹਰਸਿਮਰਤ ਕੌਰ ਗੁਰਬਾਣੀ ਪਾਠ ਕਰਨਾ ਚਾਹੁੰਦੀ ਸੀ ਪਰ ਦਰਬਾਰ ਸਾਹਿਬ ਵਿਖੇ ਸਾਧ ਲਾਣੇ ਦਾ ਪ੍ਰਭਾਵ ਹੋਣ ਕਰਕੇ ਬੀਬੀਆਂ ਨੂੰ ਪਾਠ, ਕੀਰਤਨ ਨਹੀਂ ਕਰਨ ਦਿੱਤਾ ਜਾਂਦਾ। ਜਦ ਅਸੀਂ ਪ੍ਰਕਰਮਾਂ ਕਰਦੇ ਬਾਬਾ ਦੀਪ ਸਿੰਘ ਸ਼ਹੀਦ ਦੇ ਅਸਥਾਂਨ ਕੋਲ ਪਹੁੰਚੇ ਤੇ ਉੱਪਰ ਗਏ ਜਿੱਥੇ ਲੜੀਵਾਰ ਬੀੜ ਤੇ ਅਖੰਡ ਪਾਠ ਹੋ ਰਿਹਾ ਸੀ, ਹਰਸਿਮਰਤ ਕੌਰ ਖਾਲਸਾ ਨੇ ਪਾਠੀ ਤੋਂ ਪਾਠ ਦੀ ਤੁੱਕ ਪਕੜੀ ਤੇ ਕੁੱਝ ਸਮਾਂ ਸ਼ਰਧਾ ਨਾਲ ਉੱਚੀ ਬੋਲ ਕੇ ਪਾਠ ਕੀਤਾ। ਫਿਰ ਅਸੀਂ ਦਰਸ਼ਨ ਦਿਦਾਰੇ ਕਰਕੇ ਲੰਗਰ ਛੱਕਿਆ ਅਤੇ ਸ੍ਰੋਮਣੀ ਕਮੇਟੀ ਦੇ ਸੂਚਨਾ ਦਫਤਰ ਵਿਖੇ ਪਹੁੰਚ ਗਏ। ਸੂਚਨਾ ਅਧਿਕਾਰੀ ਬਜੁਰਗ ਜੋ ਅੱਛੀ ਅੰਗ੍ਰੇਜੀ ਬੋਲਦਾ ਸੀ ਨਾਲ ਅਮਰੀਕਨ ਬੀਬੀ ਨੇ ਕੁੱਝ ਗੁਫਤਗੂ ਕੀਤੀ ਪਰ ਉਹ ਵੀ ਦਰਬਾਰ ਸਾਹਿਬ ਅਤੇ ਸਿੱਖੀ ਦੀ ਮਹਾਨਤਾ ਦਰਸਾਉਣ ਦੀ ਥਾਂ ਕਰਾਮਾਤੀ ਕ੍ਰਿਸ਼ਮੇ ਹੀ ਦੱਸੀ ਗਿਆ ਕਿ ਅੰਨ੍ਹਿਆਂ ਨੂੰ ਡਾਕਟਰ ਕੋਲ ਜਾਣ ਦੀ ਲੋੜ ਨਹੀਂ ਕੇਵਲ ਸ਼ਰਧਾ ਨਾਲ ਦਰਬਾਰ ਸਾਹਿਬ ਦੇ ਦਰਸ਼ਨ ਕਰਨ ਨਾਲ ਹੀ ਅੱਖਾਂ ਠੀਕ ਹੋ ਜਾਂਦੀਆਂ ਹਨ। ਗੁਰੂ ਸਾਹਿਬਾਨਾਂ ਨੇ ਤਾਂ ਰੋਗੀਆਂ ਦੀ ਸਹੂਲਤ ਲਈ ਦਵਾਖਾਨੇ ਖੋਲ੍ਹ ਕੇ ਅੱਛੇ ਅੱਛੇ ਵੈਦ ਰੱਖੇ ਸਨ। ਓਧਰੋਂ ਭੈਣ ਰਾਜਵਿੰਦਰ ਕੌਰ ਛੇਹਰਟਾ ਦੇ ਫੋਨ ਆਈ ਜਾ ਰਹੇ ਸਨ ਵਿਚਾਰੀ ਛੇ ਸੱਤ ਸਾਲਾਂ ਤੋਂ ਉਡੀਕ ਰਹੀ ਸੀ। ਆਖਰ ਉਨ੍ਹਾਂ ਦੀਆਂ ਗੱਲਾਂ ਤੋਂ ਬੋਰ ਹੋ ਕੇ ਅਸੀਂ ਛਿਹਰਟੇ ਨੂੰ ਚੱਲ ਪਏ। ਭੈਣ ਜੀ ਦਾ ਪ੍ਰਵਾਰ ਸਾਨੂੰ ਬੜੇ ਪਿਆਰ ਨਾਲ ਅੱਡੇ ਤੋਂ ਘਰ ਲੈ ਕੇ ਗਿਆ। ਅਸੀਂ ਇੰਟ੍ਰਨੈੱਟ ਅਤੇ ਅਖਬਾਰਾਂ ਦੇ ਜਰੀਏ ਮਿਲਦੇ ਵਿਚਾਰਾਂ ਸਦਕਾ ਭੈਣ ਭਰਾ ਬਣੇ ਸਾਂ। ਫੋਨ ਤੇ ਤਾਂ ਗੁਰਮਤਿ ਵਿਚਾਰਾਂ ਕਰਦੇ ਰਹਿੰਦੇ ਸੀ। ਜਦ ਪਹਿਲੀ ਵਾਰ ਮਿਲੇ ਤਾਂ ਅੱਖਾਂ ਨਮ ਹੋ ਗਈਆਂ ਭੈਣ ਪ੍ਰਦੇਸੀ ਵੀਰ ਨੂੰ ਮਿਲ ਕੇ ਖੁਸ਼ੀ ਵਿੱਚ ਖੀਵੀ ਹੋ ਰਹੀ ਸੀ।
ਫਿਰ ਅਸੀਂ ਚਾਹ ਪਾਣੀ ਛੱਕਣ ਉਪ੍ਰੰਤ ਸਥਾਨਕ ਗੁਰਦੁਆਰੇ ਸੰਗਤ ਦੇ ਦਰਸ਼ਨ ਕਰਕੇ ਛਿਹਰਟਾ ਸਾਹਿਬ ਜੋ ਗੁਰੂ ਹਰ ਗੋਬਿੰਦ ਸਾਹਿਬ ਜੀ ਦਾ ਇਤਿਹਾਸਕ ਅਸਥਾਂਨ ਹੈ ਨੂੰ ਰਵਾਨਾਂ ਹੋ ਗਏ, ਜਿੱਥੇ ਪਾਣੀ ਦੀ ਥੋੜ ਨੂੰ ਮੁੱਖ ਰੱਖ ਕੇ ਗੁਰੂ ਜੀ ਨੇ ਇੱਕ ਵੱਡਾ ਛੇ ਹਰਟਾਂ ਵਾਲਾ ਖੁਹ ਲਵਾਇਆ ਅਤੇ ਇਲਾਕੇ ਵਿੱਚ ਹੋਰ ਵੀ ਖੁਹ ਅਤੇ ਬਾਉਲੀਆ ਲਵਾਈਆਂ ਸਨ। ਜਦ ਅਸੀਂ ਵੱਡੇ ਗੇਟ ਤੋਂ ਇੰਟ੍ਰ ਹੋ ਰਹੇ ਸੀ ਤਾਂ ਦਾਸ ਦੀ ਨਿਗ੍ਹਾ ਗੇਟ ਦੇ ਉੱਪਰ ਲੱਗੇ ਵੱਡੇ ਸਾਰੇ ਬੋਰਡ ਤੇ ਪਈ, ਜਿਸ ਤੇ ਲਿਖਿਆ ਹੋਇਆ ਸੀ ਕਿ ਜੋ ਨਾਰੀ ਮਾਸ ਮਾਸ ਇੱਥੇ ਨਹਾਏ ਤਾਂ ਸਾਲ ਬਾਅਦ ਪੁੱਤਰ ਦੀ ਦਾਤ ਪਾਏ (ਹਵਾਲਾ ਗੁਰ ਬਿਲਾਸ ਪਾ: ਛੇਵੀਂ) ਦਾਸ ਨੇ ਉਨ੍ਹਾਂ ਅੱਖਰਾਂ ਨੂੰ ਕੈਮਰੇ ਚ’ ਬੰਦ ਕਰ ਲਿਆ। ਅੰਦਰ ਗੁਰੂ ਸਾਹਿਬ ਨੂੰ ਮੱਥਾ ਟੇਕ ਕੇ ਜਦ ਛੇ ਹਰਟਾ ਖੂਹ ਦੇਖਿਆ ਤਾਂ ਓਥੇ ਅਜੋਕੇ ਠੱਗਾਂ ਨੇ ਬੋਰਡ ਤੇ ਲਿਖਿਆ ਹੋਇਆ ਸੀ ਕਿ ਗੁਰੂ ਦਾ ਵਰ ਹੈ ਜੋ ਬੀਬੀ ਬਾਰਾਂ ਮੱਸਿਆ ਇੱਥੇ ਆਵੇਗੀ ਪੁੱਤਰ ਦੀ ਦਾਤ ਪਾਵੇਗੀ। ਦੇਖੋ ਗੁਰੂ ਸਾਹਿਬ ਨੇ ਖੂਹ ਪਾਣੀ ਦੀ ਥੁੜ ਨੂੰ ਮੁੱਖ ਰੱਖ ਕੇ ਲਵਾਏ ਸਨ। ਇਹ ਗੁਰਦੁਆਰਾ ਵੀ ਸ਼੍ਰੋਮਣੀ ਕਮੇਟੀ ਦੇ ਪ੍ਰਬੰਧ ਹੇਠ ਹੈ ਪਰ ਮਰਯਾਦਾ ਸਾਧਾਂ ਦੀ ਚੱਲ ਰਹੀ ਹੈ, ਹੁਣ ਤਾਂ ਡੇਰੇਦਾਰ ਸਾਧਾਂ ਨੂੰ ਸ਼੍ਰੋਮਣੀ ਕਮੇਟੀ ਨੇ ਮੈਂਬਰ ਵੀ ਚੁਣ ਲਿਆ ਹੈ। ਖੈਰ ਨਹੀਂ ਇਹ ਸਾਧ ਵੀ ਮਹੰਤਾਂ ਵਾਗ ਗੁਰਦੁਆਰਿਆਂ ਵਿੱਚ ਮਨਘੜਤ ਕਹਾਣੀਆਂ ਜੋੜ ਕੇ ਆਪਣੇ ਹੀ ਵੱਡੇ ਸੰਤਾਂ ਦੀ ਪੂਜਾ ਕਰਾਉਣ ਲੱਗ ਜਾਣ ਅਤੇ ਵਹਿਮਾਂ ਭਰਮਾਂ ਦੇ ਨਾਂ ਤੇ ਪਾਠਾਂ ਦੀਆਂ ਲੜੀਆਂ ਚਲਾ ਕੇ ਭੋਲੀ ਸੰਗਤ ਨੂੰ ਦੋਹੀਂ ਹੱਥੀ ਲੁੱਟਣ ਲੱਗ ਜਾਣ। ਅਸੀਂ ਘਰ ਆ ਕੇ ਭੈਣ ਜੀ ਨਾਲ ਵਿਚਾਰਾਂ ਕਰ ਰਹੇ ਸੀ ਕਿ ਸਿੱਖ ਕਦੋਂ ਜਾਗਣਗੇ? ਰਾਤ ਪਿਆਰੀ ਭੇਣ ਕੋਲ ਗੁਰਮਤਿ ਵਿਚਾਰਾਂ ਕਰਦੇ ਸਉਂ ਗਏ। ਸਵੇਰੇ ਤੜਕੇ ਸਥਾਨਕ ਗੁਰਦੁਆਰੇ ਹਰਸਿਮਰਤ ਨੇ ਕੀਰਤਨ ਅਤੇ ਦਾਸ ਨੇ ਗਰੁਬਾਣੀ ਦੀ ਵਿਚਾਰ ਕੀਤੀ। ਪ੍ਰਬੰਧਕ ਕਮੇਟੀ ਹੋਰ ਵੀ ਸਮਾਂ ਮੰਗ ਰਹੀ ਸੀ ਫਿਰ ਅਸੀ ਭੈਣ ਦੇ ਘਰ ਵਾਪਸ ਆ ਗਏ, ਭੈਣ ਜੀ ਨੇ ਮੂਲੀਆਂ ਵਾਲੇ ਪਰੌਂਠੇ ਛਕਾਏ, ਅਸੀਂ ਇੱਕ ਛੋਟਾ ਜਿਹਾ ਕੰਪਿਊਟਰ ਭੈਣ ਨੂੰ ਅਰਟੀਕਲ ਲਿਖਣ ਦੀ ਸਹੂਲਤ ਲਈ ਦਿੱਤਾ ਅਤੇ ਭੈਣ ਜੀ ਨੇ ਬਹੁਤ ਹੀ ਵਡਮੁੱਲੀ ਸ੍ਰੀ ਸਾਹਿਬ ਅਤੇ ਸਿਰੋਪਾ ਭੇਂਟ ਕਰਕੇ ਸਾਡਾ ਸਨਮਾਨ ਕੀਤਾ। ਭੈਣ ਦੇ ਪਤੀ ਜੀ ਬੜੇ ਮਿੱਠੇ ਸੁਭਾਅ ਦੇ ਹਨ ਜੋ ਗੁਰਮਤਿ ਪ੍ਰਚਾਰ ਵਿੱਚ ਭੈਣ ਜੀ ਦਾ ਪੂਰਾ ਸਾਥ ਦੇ ਰਹੇ ਹਨ। ਗੁਰੂ ਦੀ ਦਾਤ ਭੈਣ ਜੀ ਕੋਲ ਦੋ ਹੋਣਹਾਰ ਸਪੁੱਤਰ ਹਨ। ਆਪ ਜੀ ਗੁਰਮਤਿ ਅਤੇ ਸਮਾਜ ਦੇ ਵੱਖ ਵੱਖ ਵਿਸ਼ਿਆਂ ਤੇ ਬੜੇ ਗਿਆਨ ਭਰਪੂਰ ਲੇਖ ਲਿਖਦੇ ਰਹਿੰਦੇ ਹਨ ਜੋ ਦੇਸ਼ਾਂ ਵਿਦੇਸ਼ਾਂ ਦੀਆਂ ਅਖਬਾਰਾਂ ਅਤੇ ਰਸਾਲਿਆਂ ਵਿੱਚ ਛਪਦੇ ਹਨ। ਇੱਥੇ ਭੈਣ ਦੀਆਂ ਹੋਰ ਵੀ ਸਹੇਲੀਆਂ ਹਰਸਿਮਰਤ ਕੌਰ ਖਾਲਸਾ ਨੂੰ ਦੇਖ ਕੇ ਪ੍ਰਭਾਵਤ ਹੋਈਆਂ ਅਤੇ ਸਾਰਿਆਂ ਨੇ ਬੜੇ ਪਿਆਰ ਨਾਲ ਸਾਨੂੰ ਵਿਦਾ ਕੀਤਾ। ਅਸੀਂ ਅਰਦਾਸ ਕਰਦੇ ਹਾਂ ਪੰਥ ਅਜਿਹੇ ਪ੍ਰਚਾਕਾਂ ਦੀ ਕਦਰ ਕਰੇ ਅਤੇ ਉਤਸ਼ਾਹ ਵਧਾਵੇ।

ਸਾਡੀ ਭਾਰਤ ਫੇਰੀ 2012 ਦਾ ਦੂਜਾ ਹਿੱਸਾ

(13/02/12)
ਅਵਤਾਰ ਸਿੰਘ ਮਿਸ਼ਨਰੀ

ਸਾਡੀ ਭਾਰਤ ਫੇਰੀ 2012 ਦਾ ਦੂਜਾ ਹਿੱਸਾ
ਸਾਨੂੰ ਨਵਾਂ ਸਾਲ 2012 ਜਲੰਧਰ ਪੰਜਾਬ ਵਿਖੇ ਚੜ੍ਹਿਆ, ਵੱਖ ਵੱਖ ਗੁਰਦੁਆਰਿਆਂ ਅਤੇ ਵਿਸ਼ੇਸ਼ ਕਰਕੇ ਸੁਖਮਨੀ ਸਾਹਿਬ ਸੁਸਾਇਟੀ ਬਾਬਾ ਬੁੱਢਾ ਨਗਰ ਰਾਮਾਮੰਡੀ ਅਤੇ ਗੁ. ਸਿੰਘ ਸਭਾ ਨਵਾਂ ਸ਼ਹਿਰ ਵਿਖੇ, ਕੀਰਤਨ, ਕਥਾ-ਵਖਿਆਨਾਂ ਰਾਹੀਂ ਨਿਰੋਲ ਗੁਰਮਤਿ ਦਾ ਪ੍ਰਚਾਰ ਕੀਤਾ। ਇੱਥੇ ਹੀ ਇੱਕ ਹਫਤਾ ਗੁਰਮਤਿ ਗਿਆਨ ਮਿਸ਼ਨਰੀ ਕਾਲਜ ਲੁਧਿਆਨਾ ਠਹਿਰ ਕੇ, ਓਥੋਂ ਦੇ ਵਿਦਵਾਨ ਸਟਾਫ ਅਤੇ ਵਿਦਿਆਰਥੀਆਂ, ਪ੍ਰਿੰਸੀਪਲ ਗੁਰਬਚਨ ਸਿੰਘ ਥਾਈਲੈਂਡ ਅਤੇ ਜਨਰਲਿਸਟ ਸ੍ਰ. ਨਰਿੰਦਰਪਾਲ ਸਿੰਘ ਮਿਸ਼ਨਰੀ ਦੇ ਉੱਦਮ ਨਾਲ, ਦਾਸ ਦੀ ਲਿਖੀ ਪੁਸਤਕ “ਕਰਮਕਾਂਡਾਂ ਦੀ ਛਾਤੀ ਵਿੱਚ ਗੁਰਮਤਿ ਦੇ ਤਿੱਖੇ ਤੀਰ” ਕੰਪੋਜਿੰਗ ਕਰਕੇ ਜਲੰਧਰ ਦੀ ਵਿਪਨ ਪ੍ਰਿੰਟਿੰਗ ਪ੍ਰੈਸ ਤੋਂ ਗੁਰੂ ਗ੍ਰੰਥ ਪ੍ਰਚਾਰ ਮਿਸ਼ਨ ਆਫ ਯੂ. ਐੱਸ. ਏ. ਪ੍ਰਕਾਸ਼ਨ ਅਧੀਨ, ਦਾਸ ਨੇ ਆਪਣੇ ਖਰਚੇ ਤੇ ਛਪਵਾਈ। ਸੁਭਾਗ ਵੱਸ ਇਸ ਪੁਸਤਕ ਨੂੰ ਗੁਰਮਤਿ ਗਿਆਨ ਮਿਸ਼ਨਰੀ ਕਾਲਜ ਦੇ ਮੋਢੀ ਪ੍ਰਿੰਸੀਪਲ ਅਤੇ ਵਿਦਵਾਨ ਆਗੂ ਮਰਹੂਮ ਕੰਵਰ ਮਹਿੰਦਰ ਪ੍ਰਤਾਪ ਸਿੰਘ, ਗਿ. ਜਗਤਾਰ ਸਿੰਘ ਜਾਚਕ, ਡਾ. ਗੁਰਮੀਤ ਸਿੰਘ ਬਰਸਾਲ, ਪ੍ਰਿੰਸੀਪਲ ਗੁਰਬਚਨ ਸਿੰਘ ਥਾਈਲੈਂਡ, ਪ੍ਰਿੰਸੀਪਲ ਗਿ. ਸੁਰਜੀਤ ਸਿੰਘ ਦਿੱਲ੍ਹੀ, ਪ੍ਰਸਿੱਧ ਵਿਦਵਾਨ ਵੀਰ ਭੁਪਿੰਦਰ ਸਿੰਘ ਅਤੇ ਹੋਰ ਪਤਵੰਤੇ ਸੱਜਨਾਂ ਨੇ 4 ਜਨਵਰੀ 2012 ਨੂੰ ਰੀਲੀਜ ਕੀਤਾ।
ਫਿਰ ਅਸੀਂ ਵਾਪਸ ਜਲੰਧਰ ਆ ਗਏ ਅਤੇ ਫਰੀਦਾਬਾਦ ਦੀ ਸੰਗਤ ਦੇ ਪ੍ਰੇਮ ਅਤੇ ਸੱਦੇ ਤੇ, ਰਾਤ ਦੀ ਗੱਡੀ ਤੇ ਦਿੱਲੀ ਨੂੰ ਰਵਾਨਾ ਹੋਏ। ਗੱਡੀ ਵਿੱਚ ਇੱਕ ਰਜਨੀਸ਼ ਦੇ ਸਟੂਡੈਂਟ ਅਤੇ ਇੱਕ ਸਿੱਖ ਸਾਇੰਦਾਨ ਨੂੰ ਹਰਸਿਮਰਤ ਕੌਰ ਖਾਲਸਾ ਨੇ ਗੁਰਮਤਿ ਫਲੌਸਫੀ ਤੋਂ ਜਾਣੂ ਕਰਵਾਇਆ। ਕਰੀਬ ਸਵੇਰੇ 7 ਵਜੇ ਅਸੀਂ ਦਿੱਲ੍ਹੀ ਪਹੁੰਚੇ ਅਤੇ ਗੁਰਦੁਆਰਾ ਸੀਸਗੰਜ ਸਾਹਿਬ ਗਏ, ਜਿੱਥੇ ਸੰਗਤ ਅਤੇ ਪ੍ਰਬੰਧਕ ਸੱਜਨ ਬੜੇ ਪ੍ਰੇਮ ਨਾਲ, ਓਥੇ ਰਹਿਣ ਲਈ ਕਹਿੰਦੇ ਹੋਏ, ਆਓ ਭਗਤ ਕਰ ਰਹੇ ਸਨ ਪਰ ਜਦ ਅਸੀਂ ਕੁੱਝ ਦਿਨ ਪਹਿਲੇ ਸ੍ਰੀ ਦਰਬਾਰ ਸਾਹਿਬ ਅੰਮ੍ਰਿਤਸਰ ਗਏ ਸੀ, ਓਥੇ ਦੇ ਪ੍ਰਬੰਧਕਾਂ ਅਤੇ ਸੇਵਾਦਾਰਾਂ ਦਾ ਰਵੱਈਆ ਰੁੱਖਾ ਸੀ। ਏਨੇ ਨੂੰ ਸਾਡਾ ਇੰਟ੍ਰਨੈਟ ਅਤੇ ਮੀਡੀਏ ਰਾਹੀਂ ਬਣਿਆਂ ਦੋਸਤ ਸ੍ਰ. ਹਰਜੀਤ ਸਿੰਘ ਫਰੀਦਾਬਾਦ ਆਪਣੀ ਕਾਰ ਲੈ ਆਇਆ, ਅਸੀਂ ਪਹਿਲੀ ਵਾਰ ਇੱਕ-ਦੂਜੇ ਨੂੰ ਬੜੀ ਗਰਮਜੋਸ਼ੀ ਨਾਲ ਮਿਲੇ ਅਤੇ ਹਰਜੀਤ ਸਿੰਘ ਨੇ ਸਾਡਾ ਸਮਾਨ ਆਪਣੀ ਕਾਰ ਵਿੱਚ ਰੱਖਿਆ ਅਤੇ ਸਾਨੂੰ ਆਪਣੇ ਘਰ ਲੈ ਗਿਆ। ਜਿੱਥੇ ਅਸੀਂ ਇਸ਼ਨਾਨ ਅਤੇ ਅਰਾਮ ਕੀਤਾ। ਸ੍ਰ. ਹਰਜੀਤ ਸਿੰਘ ਅਤੇ ਸਾਥੀਆਂ ਨੇ ਬੜੇ ਚਾਅ ਨਾਲ ਸਾਡੇ ਪ੍ਰਚਾਰ ਦੇ ਪ੍ਰੋਗ੍ਰਾਮ ਬਹੁਤ ਸਾਰੇ ਗੁਰਦੁਆਰਿਆਂ ਵਿੱਚ ਬੁੱਕ ਕੀਤੇ ਹੋਏ ਸਨ ਉਹ ਨਿਭਾਏ, ਕਰੀਬ ਹਰ ਪ੍ਰੋਗ੍ਰਾਮ ਵਿੱਚ ਸ੍ਰ. ਹਰਜੀਤ ਸਿੰਘ ਜੀ ਸਾਨੂੰ ਲੈ ਕੇ ਜਾਂਦੇ ਰਹੇ। ਇੱਥੇ ਇਨ੍ਹਾਂ ਦੇ ਘਰ ਵਿਖੇ ਹੀ ਸਾਨੂੰ ਫਰੀਦਾਬਾਦ ਦੇ ਸਰਗਰਮ ਆਗੂ ਸ੍ਰ. ਭਗਵਾਨ ਸਿੰਘ ਮਿਸ਼ਨਰੀ, ਸ੍ਰ. ਉਪਕਾਰ ਸਿੰਘ ਮਿਸ਼ਨਰੀ ਸਿੱਖ ਆਗੂ ਸ੍ਰ. ਸੁਖਦੇਵ ਸਿੰਘ ਅਤੇ ਭਾਈ ਅਨੂਪ ਸਿੰਘ ਮਿਸ਼ਨਰੀ ਮਿਲੇ। ਸਾਡੇ ਵੱਲੋਂ ਕੀਤਾ ਗਿਆ ਸਿਧਾਂਤਕ ਪ੍ਰਚਾਰ ਸੁਣ ਕੇ ਫਰੀਦਾਬਾਦ ਅਤੇ ਦਿੱਲ੍ਹੀ ਦੀਆਂ ਸੰਗਤਾਂ ਨੇ ਬੜਾ ਪ੍ਰੇਮ ਕੀਤਾ। ਕਰੀਬ ਹਰੇਕ ਗੁਰਦੁਆਰਾ ਹੀ ਗੁਰਮਤਿ ਪ੍ਰੋਗ੍ਰਾਮ ਚਾਹੁੰਦਾ ਸੀ ਪਰ ਸਾਡੇ ਪਾਸ ਇਨ੍ਹਾਂ ਸਮਾਂ ਨਹੀਂ ਸੀ ਕਿਉਂਕਿ ਅਸੀਂ 13 ਜਨਵਰੀ 2012 ਨੂੰ ਵਾਪਸ ਅਮਰੀਕਾ ਜਾਣਾ ਸੀ। ਇਸ ਕਰਕੇ ਅਸੀਂ ਸਭ ਥਾਂ ਨਹੀਂ ਜਾ ਸੱਕੇ ਪਰ ਫਿਰ ਵੀ ਸੁਭਾ ਸ਼ਾਮ 13 ਤਰੀਕ ਤੱਕ ਵੱਖ-ਵੱਖ ਥਾਵਾਂ ਤੇ ਹਾਜਰੀ ਭਰ ਕੇ, ਠੇਠ ਪੰਜਾਬੀ ਅਤੇ ਅੰਗ੍ਰੇਜੀ ਰਾਹੀਂ ਗੁਰਮਤਿ ਦਾ ਸਿਧਾਂਤਕ ਪ੍ਰਚਾਰ ਕਰਦੇ ਰਹੇ।
ਫਰੀਦਾਬਾਦ ਦੇ ਪ੍ਰਬੰਧਕ ਅਤੇ ਸੰਗਤਾਂ ਪੰਜਾਬ ਨਾਲੋਂ ਗੁਰਮਤਿ ਵਿੱਚ ਜਿਆਦਾ ਪੱਕੇ ਹਨ। ਇੱਥੇ ਸ੍ਰ. ਉਪਕਾਰ ਸਿੰਘ ਫਰੀਦਾਬਾਦ, ਬੀਬੀ ਹਰਬੰਸ ਕੌਰ, ਭਾਈ ਮਦਰੱਸਾ ਜੀ ਅਤੇ ਸ੍ਰ. ਸੁਰਿੰਦਰ ਸਿੰਘ ਜੋ ਵਲੱਖਣ ਤਰੀਕੇ ਰਾਹੀਂ ਸਿੱਖੀ ਦਾ ਪ੍ਰਚਾਰ ਕਰ ਰਹੇ ਹਨ। ਉਨ੍ਹਾਂ ਨੇ ਸਿੱਖੀ ਤੇ ਕਰਮਕਾਂਡਾਂ ਵਾਲੀ ਫਿਲਮ ਸੀ. ਡੀ. ਜਾਰੀ ਕਰਦੇ ਸਾਨੂੰ ਵਿਸ਼ੇਸ਼ ਤੌਰ ਤੇ ਸਮਾਂ ਦਿੱਤਾ। ਫਰੀਦਾਬਾਦ ਵਿੱਚ ਪੰਚ ਪ੍ਰਧਾਨੀ ਪੰਚਾਇਤ ਦੇ ਆਗੂ ਵੀ ਬੜੀ ਸਰਗਰਮੀ ਨਾਲ ਪ੍ਰੋਗ੍ਰਾਮਾਂ ਵਿੱਚ ਹਾਜਰੀਆਂ ਭਰਦੇ ਰਹੇ। ਖਾਸ ਕਰਕੇ ਸ੍ਰ. ਸੁਖਦੇਵ ਸਿੰਘ ਜੋ ਸਾਨੂੰ ਸਿੰਘ ਸਭਾ ਗੁਰਦੁਆਰਾ ਗੋਬਿੰਦਪੁਰੀ ਦਿੱਲ੍ਹੀ ਵਿਖੇ ਵੀ ਲੈ ਕੇ ਗਏ ਜੋ ਗੁਰਦੁਆਰਾ ਬੰਗਲਾ ਸਾਹਿਬ ਵਿਖੇ ਵੀ ਕਥਾ ਪ੍ਰਚਾਰ ਦਾ ਸਮਾਂ ਲੈਣਾ ਚਾਹੁੰਦੇ ਸਨ ਪਰ ਸਾਡੇ ਕੋਲ ਹੁਣ ਸਮਾਂ ਨਹੀਂ ਸੀ। ਇਹ ਸਾਰੇ ਵੀਰ ਖਾਸ ਕਰਕੇ ਸ੍ਰ. ਹਰਜੀਤ ਸਿੰਘ ਤਾਂ ਹੋਰ 3-4 ਮਹੀਨੇ ਕਥਾ ਪਚਾਰ ਲਈ ਹੋਰ ਸਮਾਂ ਚਾਹੁੰਦੇ ਸਨ। ਅਸੀਂ 13 ਜਨਵਰੀ ਤੱਕ ਵੀਰ ਹਰਜੀਤ ਸਿੰਘ ਦੇ ਘਰ ਹੀ ਰਹੇ, ਇਨ੍ਹਾਂ ਦੇ ਪ੍ਰਵਾਰ ਨੇ ਇੱਕ ਪ੍ਰਵਾਰ ਵਾਂਗ ਸਾਡੀ ਸੇਵਾ ਕੀਤੀ। ਇਹ ਸਾਰਾ ਹੀ ਪ੍ਰਵਾਰ ਗੁਰਸਿੱਖ ਹੈ, ਸ੍ਰ ਹਰਜੀਤ ਸਿੰਘ ਜੀ ਦੀਆਂ ਦੋਨੋ ਬੇਟੀਆਂ ਕੀਰਤਨ ਅਤੇ ਗਤਕਾ ਬਹੁਤ ਵਧੀਆ ਜਾਣਦੀਆਂ ਹਨ, ਵੀ ਸਾਡੇ ਪ੍ਰ੍ਰੋਗਮਾਂ ਵਿੱਚ ਹਾਜਰੀ ਭਰਦੀਆਂ ਰਹੀਆਂ। ਇੱਥੇ ਹੀ ਫਰੀਦਾਬਾਦ ਦੇ ਗਤਕਾ ਮਾਸਟਰ ਭਾਈ ਮਨਜੀਤ ਸਿੰਘ ਵੀ ਬੜੇ ਪਿਆਰ ਨਾਲ ਮਿਲਦੇ ਰਹੇ। ਸ੍ਰ. ਹਰਜੀਤ ਸਿੰਘ ਜੀ ਪ੍ਰੋ. ਜਸਵੰਤ ਸਿੰਘ ਸਿੰਘਾਪੁਰ ਦੇ ਪਰਮ ਮਿਤਰ ਹਨ। ਪ੍ਰੋ. ਜਸਵੰਤ ਸਿੰਘ ਨੇ ਸਿੰਘਾਪੁਰ, ਮਲੇਸ਼ੀਆ ਅਤੇ ਅਸਟ੍ਰੇਲੀਆ ਵਿਖੇ ਗੁਰਬਾਣੀ ਸੰਥਿਆ ਪ੍ਰਚਾਰ ਦੀ ਲਹਿਰ ਚਲਾਈ ਹੋਈ ਹੈ।
ਇੱਥੇ ਹੀ ਇੰਟ੍ਰਨੈੱਟ ਅਤੇ ਮਿਸ਼ਨਰੀ ਸੇਧਾਂ ਮੈਗਜੀਨ ਰਾਹੀਂ ਪਕਿਸਤਾਨ ਤੋਂ ਬਣੇ ਸਾਡੇ ਪ੍ਰਵਾਰਕ ਮੈਂਬਰ ਭਾਈ ਅਨੂੰਪ ਸਿੰਘ ਜੋ ਸੁਭਾਗ ਵੱਸ ਅੱਜ ਕੱਲ੍ਹ ਫਰੀਦਾਬਾਦ ਵਿਖੇ ਰਹਿ ਰਹੇ ਹਨ, ਪੂਰੇ ਪ੍ਰੀਵਾਰ ਸਮੇਤ ਸਾਨੂੰ ਸ੍ਰ. ਹਰਜੀਤ ਸਿੰਘ ਦੇ ਘਰ ਮਿਲਣ ਆਏ। ਇੰਟ੍ਰਨੈੱਟ ਅਤੇ ਫੋਨ ਤੇ ਤਾਂ ਅਸੀਂ ਗਲਬਾਤ ਅਤੇ ਗੁਰਮਤਿ ਵਿਚਾਰਾਂ ਕਰਦੇ ਹੀ ਰਹਿੰਦੇ ਸੀ ਪਰ ਪਹਿਲੀ ਵਾਰ ਇੱਕ ਦੂਜੇ ਦੇ ਲਾਈਵ ਦਰਸ਼ਨ ਕੀਤੇ। ਭਾਈ ਅਨੂੰਪ ਸਿੰਘ ਦਾ ਸਾਰਾ ਪਰੀਵਾਰ ਹੀ ਸਿੱਖੀ ਪ੍ਰਤੀ ਬੜਾ ਸ਼ਧਾਲੂ ਹੈ। ਜਿਨ੍ਹਾਂ ਚਿਰ ਅਸੀਂ ਫਰੀਦਾਬਾਦ ਵਿਖੇ ਰਹੇ ਕਰੀਬ ਹਰ ਰੋਜ ਹੀ ਅਨੂਪ ਸਿੰਘ ਜੀ ਸਾਨੂੰ ਦੋਨਾਂ ਨੂੰ ਵਾਰੋ ਵਾਰੀ ਆਪਣੇ ਮੋਟਰ ਸਾਈਕਲ ਤੇ ਘਰ ਲੈ ਜਾਂਦੇ, ਜਿੱਥੇ ਅਸੀਂ ਕਈ ਕਈ ਘੰਟੇ ਸਿੱਖੀ ਅਤੇ ਦੁਖ ਸ਼ੁਖ ਦੀਆਂ ਗੱਲਾਂ ਕਰਦੇ ਰਹਿੰਦੇ। ਅਨੂਪ ਸਿੰਘ ਜੀ ਦੇ ਮਾਤਾ ਜੀ ਅਤੇ ਭੈਣ ਜੀ ਹਰ ਵੇਲੇ ਵੰਨ ਸੁਵੰਨੇ ਪਕਵਾਨਾਂ ਨਾਲ ਸਾਡੀ ਸੇਵਾ ਕਰਦੇ ਰਹੇ। ਜਿਸ ਦਿਨ ਅਸੀਂ ਅਮਰੀਕਾ ਨੂੰ ਵਾਪਸ ਜਾਣਾ ਸੀ ਕੁਦਰਤੀ 13 ਜਨਵਰੀ ਸੀ। ਫਰੀਦਾਬਾਦ ਵਿਖੇ ਹਰ ਮਹੀਨੇ ਦੀ 13 ਤਰੀਕ ਨੂੰ “ਕਾਲਾ ਦਿਵਸ” ਮਨਾਇਆ ਜਾਂਦਾ ਹੈ ਜਿਸ ਵਿੱਚ ਫਰੀਦਾਬਾਦ ਦੇ ਗੁਰਦੁਆਰਿਆਂ ਦੇ ਪ੍ਰਬੰਧਕ ਵੀ ਸ਼ਾਮਲ ਹੁੰਦੇ ਹਨ ਕਿਉਂਕਿ 13 ਤਰੀਕ ਨੂੰ ਹੀ ਪਿੰਡ ਦਿਆਲਪੁਰਾ ਭਾਈਕਾ ਬਾਠਿੰਡਾ ਵਿਖੇ ਸ੍ਰੋਮਣੀ ਕਮੇਟੀ ਮੱਕੜ ਪੀਰੀਅਡ, ਡੇਰੇਦਾਰ, ਦਮਦਮੀ ਟਕਸਾਲ ਦੇ ਧੁੱਮਾ ਗਰੁੱਪ ਅਤੇ ਕੁੱਝ ਨਿਹੰਗ ਜਥੇਬੰਦੀਆਂ ਨੇ ਡੰਕੇ ਦੀ ਚੋਟ ਨਾਲ ਅਖਬਾਰੀ ਇਸ਼ਤਿਹਾਰਾਂ ਤੇ ਲੱਖਾਂ ਰੁਪਈਆ ਖਰਚ ਕੇ, ਅਖੌਤੀ ਦਸਮ ਗ੍ਰੰਥ ਨੂੰ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਬਰਾਬਰ ਮਾਨਤਾ ਦਿੰਦੇ ਹੋਏ, ਇਸ ਦਾ ਅਖੰਡ ਪਾਠ ਕੀਤਾ ਸੀ, ਜਿਸ ਵਿੱਚ ਤਖਤਾਂ ਦੇ ਅਖੌਤੀ ਜਥੇਦਾਰ ਵੀ ਪਹੁੰਚੇ ਹੋਏ ਸਨ।
ਅਖੌਤੀ ਦਸਮ ਗ੍ਰੰਥ ਉਹ ਗ੍ਰੰਥ ਹੈ ਜਿਸ ਵਿੱਚ ਕੁਝਕੁ ਭਾਗ ਨੂੰ ਛੱਡ ਕੇ ਬਾਕੀ ਸਾਰੇ ਵਿੱਚ ਲਚਰਤਾ ਦੀਆਂ ਸਾਰੀਆਂ ਹੱਦ ਬੰਦੀਆਂ ਟੱਪੀਆਂ ਗਈਆਂ ਹਨ। ਸਿੱਖ ਕੌਮ ਨੂੰ ਬਾਬਰ, ਅਬਦਾਲੀ ਅਤੇ ਅੰਗ੍ਰੇਜ ਖਤਮ ਨਾ ਕਰ ਸੱਕੇ ਪਰ ਚਲਾਕ ਬ੍ਰਾਹਮਣ ਜੋ ਸਦਾ ਹੀ ਇਸ ਦਾ ਵਿਰੋਧੀ ਰਿਹਾ ਜਿਵੇਂ ਬ੍ਰਾਹਮਣ ਬੀਰਬਲ, ਚੰਦੂ, ਗੰਗੂ ਅਤੇ ਅਤੇ ਅਜੋਕੀ ਆਰ. ਐੱਸ. ਐੱਸ ਤੱਕ ਅੱਡੀ ਚੋਟੀ ਦਾ ਜੋਰ ਲੱਗਾ ਹੋਇਆ ਹੈ, ਜੋ ਅੱਜ ਸਿੱਖੀ ਸਰੂਪ ਅਤੇ ਸਿੱਖੀ ਬਾਣਾ ਧਾਰਣ ਕਰਕੇ, ਅਕਾਲ ਤਖਤ ਤੋਂ ਲੈ ਕੇ, ਸ੍ਰੋਮਣੀ ਕਮੇਟੀ, ਬਾਦਲ ਅਕਾਲੀ ਦਲ, ਡੇਰੇ ਅਤੇ ਦਮਦਮੀ ਟਕਸਾਲ ਵਿੱਚ ਵੀ ਘੁਸੜ ਚੁੱਕਾ ਹੈ। ਇਸ ਸਿੱਖੀ ਵਿਰੋਧੀ ਲਾਬੀ ਨੇ ਦੇਖਿਆ ਕਿ “ਕ੍ਰਾਂਤੀਕਾਰੀ ਸ਼ਬਦ ਗੁਰੂ, ਗੁਰੂ ਗ੍ਰੰਥ ਸਾਹਿਬ” ਹੀ ਸਿੱਖੀ ਦਾ ਮੂਲ ਸੋਮਾ ਹੈ ਕਿਉਂ ਨਾਂ ਸਿੱਖਾਂ ਦਾ ਇਸ ਤੋਂ ਯਕੀਨ ਡੁਲਾ ਦਿੱਤਾ ਜਾਵੇ, ਡੇਰੇਦਾਰਾਂ ਰਾਹੀਂ ਥੋਥੇ ਕਰਮਕਾਂਡ ਤਾਂ ਸਿੱਖਾਂ ਵਿੱਚ ਪਹਿਲਾਂ ਹੀ ਘਸੋੜ ਹੀ ਦਿੱਤੇ ਹਨ ਪਰ ਫਿਰ ਵੀ ਗੁਰੂ ਗ੍ਰੰਥ ਦੀ ਸਿਧਾਂਤਕ ਫਿਲਾਸਫੀ ਸਿੱਖਾਂ ਨੂੰ ਸਿੱਖੀ ਵਿੱਚ ਪੱਕੇ ਅਤੇ ਜੀਵਤ ਰੱਖਦੀ ਹੈ। ਜਦ ਕਿ ਜਗਤ ਪ੍ਰਸਿੱਧ ਹੈ ਕਿ ਹਰੇਕ ਕੌਮ ਦਾ ਇੱਕ ਗ੍ਰੰਥ, ਪੰਥ, ਵਿਧਾਨ ਅਤੇ ਨਿਸ਼ਾਨ ਹੁੰਦਾ ਹੈ ਇਵੇਂ ਹੀ ਸਿੱਖਾਂ ਦਾ ਵੀ ਇੱਕ ਗ੍ਰੰਥ, ਗੁਰੂ ਗ੍ਰੰਥ ਸਾਹਿਬ, ਇੱਕ ਖਾਲਸਾ ਪੰਥ, ਇੱਕ ਵਿਧਾਨ (ਰਹਿਤ ਮਰਯਾਦਾ) ਇੱਕ ਨਿਸ਼ਨ ਅਤੇ ਇੱਕ ਨਾਨਕਸ਼ਾਹੀ ਕੈਲੰਡਰ ਹੈ। ਇਸ ਸਿੱਖ ਵਿਰੋਧੀ ਲਾਬੀ ਨੇ ਬਾਕੀ ਸਭ ਵਿੱਚ ਤਾਂ ਰਲਾ ਕਰ ਹੀ ਦਿੱਤਾ ਪਰ ਇੱਕ ਗੁਰੂ ਗ੍ਰੰਥ ਸਾਹਿਬ ਹੀ ਸੀ ਜਿਸ ਤੇ ਇਹ ਅਖੌਤੀ ਦਸਮ ਗ੍ਰੰਥ ਵਾਲਾ ਜੋਰਦਾਰ ਹਮਲਾ ਕੀਤਾ ਗਿਆ ਜੋ ਪੰਥ ਦਰਦੀ ਜਾਗ੍ਰਿਤ ਜਮੀਰ ਵਾਲੇ ਸਿੱਖਾਂ ਨੇ ਬਰਦਾਸ਼ਤ ਨਹੀਂ ਕੀਤਾ, ਭਾਵੇਂ ਪਹਿਲਾਂ ਵੀ ਪ੍ਰੋ. ਗੁਰਮੁਖ ਸਿੰਘ, ਭਾਈ ਦਿੱਤ ਸਿੰਘ, ਗਿ. ਭਾਗ ਸਿੰਘ ਅੰਬਾਲਾ, ਬਾਬਾ ਗੁਰਬਖਸ਼ ਸਿੰਘ ਕਾਲਾ ਅਫਗਾਨਾ, ਸ੍ਰ. ਜੋਗਿੰਦਰ ਸਿੰਘ ਸਪੋਕਸਮੈਨ, ਪ੍ਰੋ ਦਰਸ਼ਨ ਸਿੰਘ ਸਾਬਕਾ ਜਥੇਦਾਰ ਸ੍ਰੀ ਅਕਾਲ ਤੱਖਤ ਅਤੇ ਹੋਰ ਪੰਥ ਦਰਦੀ ਅਤੇ ਮਿਸ਼ਨਰੀ ਸਿੱਖ ਵਿਦਵਾਨ ਸਨ ਅਤੇ ਹਨ।
ਅਸੀਂ ਵੀ ਵਿਸ਼ੇਸ਼ ਤੌਰ ਤੇ ਇਸ “ਕਾਲੇ ਦਿਵਸ” ਵਿੱਚ ਸ਼ਾਮਲ ਹੋਏ ਅਤੇ ਸਾਨੂੰ ਸ੍ਰੋਮਣੀ ਸਿੱਖ ਸਮਾਜ ਦੇ ਪ੍ਰਬੰਧਕਾਂ ਅਤੇ ਸੰਗਤਾਂ ਨੇ ਸਨਮਾਨਤ ਕੀਤਾ, ਜਿਸ ਦੀਆਂ ਖਬਰਾਂ ਪਹਿਲੇ ਛਪ ਚੁੱਕੀਆਂ ਹਨ। ਦਾਸ ਨੇ ਕਰੀਬ ਹਰੇਕ ਗੁਰਦੁਆਰੇ ਜਿੱਥੇ ਵੀ ਪ੍ਰਚਦਰ ਦਾ ਸਮਾਂ ਮਿਲਿਆ ਆਪਣੀ ਲਿਖੀ ਪੁਸਤਕ ਲਾਇਬ੍ਰੇਰੀ ਵਾਸਤੇ ਫਰੀ ਭੇਟਾ ਕੀਤੀ। ਜਦ ਅਸੀਂ ਇਸ ਸਮਾਗਮ ਵਿੱਚੋਂ ਨਿਕਲ ਰਹੇ ਸਾਂ ਫਰੀਦਾਬਾਦ ਦੀਆਂ ਪ੍ਰੇਮੀ ਸੰਗਤਾਂ ਦੀਆਂ ਅੱਖਾਂ ਨਮ ਸਨ ਪਤਾ ਨਹੀਂ ਇਹ ਵਿਦੇਸ਼ੀ ਪ੍ਰਚਾਰਕ ਕਦ ਫਿਰ ਦੁਬਾਰਾ ਅਦਉਣਗੇ? ਸ੍ਰ. ਹਰਜੀਤ ਸਿੰਘ ਅਤੇ ਅਨੂਪ ਸਿੰਘ ਦਾ ਪ੍ਰੀਵਾਰ ਤਾਂ ਇਉਂ ਮਹਿਸੂਸ ਕਰ ਰਿਹਾ ਸੀ ਜਿਵੇਂ ਇਹ ਸਾਡੇ ਪ੍ਰੀਵਾਰ ਦੇ ਵੀਰ ਭੈਣ ਸਾਡੇ ਤੋਂ ਵਿਛੜ ਰਹੇ ਹਨ, ਖਾਸ ਕਰਕੇ ਸ੍ਰ. ਹਰਜੀਤ ਸਿੰਘ ਅਤੇ ਭਾਈ ਅਨੂਪ ਸਿੰਘ ਦੇ ਮਾਤਾ ਜੀ ਬੜੇ ਬੈਰਾਗ ਵਿੱਚ ਸਨ ਪਰ ਦਾਣੇ ਪਾਣੀ ਦੀ ਖੇਡ ਹੈ “ਜਹਾਂ ਦਾਣੇ ਤਹਾਂ ਖਾਣੇ ਨਾਨਕਾ ਸਚ ਹੇ” ਅਸੀਂ ਸਾਰੇ ਫਰੀਦਾਬਾਦ ਅਤੇ ਦਿੱਲ੍ਹੀ ਦੀਆਂ ਸੰਗਤਾਂ ਅਤੇ ਪ੍ਰਬੰਧਕਾਂ ਦੇ ਤਹਿ ਦਿਲੋਂ ਧੰਨਵਾਦੀ ਹਾਂ ਜਿਨ੍ਹਾਂ ਨੇ ਸਾਨੂੰ ਗੁਰਮਤਿ ਪ੍ਰਚਾਰ ਕਰਨ ਦਾ ਸੁਭਾਗ ਸਮਾਂ ਅਤੇ ਪਿਆਰ ਬਖਸ਼ਿਆ, ਫਿਰ ਵੀ ਜਦ ਸਮਾਂ ਮਿਲਿਆ ਦੁਬਾਰਾ ਸੰਗਤਾਂ ਅਤੇ ਸਨੇਹੀਆਂ ਦੇ ਦਰਸ਼ਨ ਕਰਾਂਗੇ, ਅਸੀਂ ਕਿਰਤੀ ਪ੍ਰਚਾਰਕ ਹਾਂ ਵਿਹਲੜ ਸਾਧ ਨਹੀਂ, ਸਿੱਖ ਧਰਮ ਕਿਰਤੀਆਂ ਦਾ ਧਰਮ ਹੈ ਨਾਂ ਕਿ ਪੁਜਾਰੀਆਂ ਦਾ, ਅਰਦਾਸ ਕਰਿਓ ਅਸੀਂ ਕਿਰਤ ਵਿਰਤ ਕਰਦੇ ਹੋਏ ਸਿੱਖੀ ਦਾ ਪ੍ਰਚਾਰ ਵੀ ਕਰਦੇ ਰਹੀਏ, ਸੰਪ੍ਰਕ ਲਈ ਨੰਬਰ (510-432-5827) ਸਭਨਾਂ ਦਾ ਧੰਨਵਾਦ!

“ਕਰਮਕਾਂਡਾਂ ਦੀ ਛਾਤੀ ਵਿੱਚ ਗੁਰਮਤਿ ਦੇ ਤਿੱਖੇ ਤੀਰ” ਲੋਕ ਅਰਪਣ

ਪ੍ਰਸਿੱਧ ਪ੍ਰਚਾਰਕ ਭਾਈ ਅਵਤਾਰ ਸਿੰਘ ਮਿਸ਼ਨਰੀ ਦੀ ਧਾਰਮਿਕ ਪਲੇਠੀ ਪੁਸਤਕ “ਕਰਮਕਾਂਡਾਂ ਦੀ ਛਾਤੀ ਵਿੱਚ ਗੁਰਮਤਿ ਦੇ ਤਿੱਖੇ ਤੀਰ” ਲੋਕ ਅਰਪਣ - ਪ੍ਰਮਿੰਦਰ ਸਿੰਘ ਪ੍ਰਵਾਨਾਂ 510-415-9377 02-03-12

2/4/2012


ਯੂਨੀਅਨ ਸਿਟੀ-ਕੈਲੇਫੋਰਨੀਆਂ (ੂੰੳ) ਪ੍ਰਮਿੰਦਰ ਸਿੰਘ ਪ੍ਰਵਾਨਾ-ਬੀਤੇ ਦਿਨੀਂ 29 ਜਨਵਰੀ 2012 ਨੂੰ, ਯੂਨੀਅਨ ਸਿਟੀ ਲਾਇਬ੍ਰੇਰੀ ਵਿੱਚ, ਗੁਰੂ ਗ੍ਰੰਥ ਪ੍ਰਚਾਰ ਮਿਸ਼ਨ ਆਫ ਯੂ.ਐੱਸ.ਏ, ਇੰਟ੍ਰਨੈਸ਼ਲ ਸਿੰਘ ਸਭਾ ਯੂ.ਐੱਸ.ਏ., ਅਖੌਤੀ ਸੰਤਾਂ ਦੇ ਕੌਤਕ ਗਰੁੱਪ ਅਤੇ ਸਹਿਤ ਸਭਾ ਕੈਲੇਫੋਰਨੀਆਂ ਦੇ ਸਾਂਝੇ ਉੱਦਮ ਨਾਲ ਇੱਕ ਭਾਰੀ ਇਕੱਠ ਵਿੱਚ ਭਾਈ ਅਵਤਾਰ ਸਿੰਘ ਮਿਸ਼ਨਰੀ ਦੀ ਧਾਰਮਿਕ ਪਲੇਠੀ ਪੁਸਤਕ ਲੋਕ ਅਰਪਣ ਹੋਈ। ਸਮਾਗਮ ਦੇ ਸ਼ੁਰੂ ਵਿੱਚ ਹਰਮਨ ਪਿਆਰੇ ਸਮਾਜ ਸੇਵੀ ਮਰਹੂਮ ਬਾਬਾ ਨੰਦਨ ਸਿੰਘ ਸਿਧਵਾਂ ਕਲਾਂ ਜੋ ਅਕਾਲ ਚਲਾਣਾ ਕਰ ਗਏ ਸਨ, ਨੂੰ ਸ਼ਧਾਂਜਲੀ ਅਰਪਨ ਕੀਤੀ ਗਈ। ਪੁਸਤਕ ਤੇ ਪਰਚਾ ਪਾਠ ਹੋਇਆ। ਮੰਚ ਸੰਚਾਲਨ ਪ੍ਰਮਿੰਦਰ ਸਿੰਘ ਪ੍ਰਵਾਨਾਂ ਵੱਲੋਂ ਕੀਤਾ ਗਿਆ ਅਤੇ ਭਾਈ ਅਵਤਾਰ ਸਿੰਘ ਜੀ ਨੂੰ ਪੁਸਤਕ ਬਾਰੇ ਬੋਲਣ ਲਈ ਕਿਹਾ ਗਿਆ। ਉਨ੍ਹਾਂ ਨੇ ਦੱਸਿਆ ਕਿ ਇਹ ਪੁਸਤਕ ਸਿੱਖ ਸਮਾਜ ਵਿੱਚ, ਭੇਖੀ ਸਾਧਾਂ, ਲਾਲਚੀ ਪੁਜਾਰੀਆਂ ਅਤੇ ਪ੍ਰਚਾਕਾਂ ਵੱਲੋਂ ਘਸੋੜੇ ਗਏ ਥੋਥੇ ਕਰਮਕਾਂਡ, ਜੋ ਅੱਜ ਅਮਰਵੇਲ ਵਾਂਗ ਸਿੱਖੀ ਦੇ ਬੂਟੇ ਤੇ ਛਾ ਗਏ ਹਨ, ਜਿਨ੍ਹਾਂ ਨੂੰ ਮਾਇਆਧਾਰੀ ਅਤੇ ਅਗਿਆਨੀ ਸਿੱਖਾਂ ਨੇ ਮਰਯਾਦਾ ਸਮਝ ਕੇ ਅਪਣਾਅ ਲਿਆ ਹੈ, ਬਾਰੇ ਸਿੱਖ ਜਗਤ ਨੂੰ ਜਾਗ੍ਰਿਤ ਕਰਨ ਲਈ, ਕਈ ਸਾਲਾਂ ਦੀ ਮਿਹਨਤ ਬਾਅਦ, ਗੁਰਮਤਿ ਪ੍ਰਚਾਰ ਅਤੇ ਪਾਠਕਾਂ ਦੀ ਭਾਰੀ ਮੰਗ ਕਰਕੇ, ਆਪਣੇ ਖਰਚੇ ਤੇ ਛਪਵਾਈ ਗਈ ਹੈ। ਆਪ ਜੀ, ਪੜ੍ਹਨ ਅਤੇ ਵਿਚਾਰਨ ਬਾਰੇ ਫੋਨ ਨੰਬਰ 510-432-5827 ਤੇ ਜਾਂ ਈਮੇਲ ਸਨਿਗਹਸਟੁਦੲਨਟ੍‍ੇਅਹੋ।ਚੋਮ ਤੇ ਸੰਪਰਕ ਕਰਕੇ, ਇਹ ਪੁਸਤਕ ਪ੍ਰਾਪਤ ਕਰ ਸਕਦੇ ਹੋ। ਉਨ੍ਹਾਂ ਪੁਸਤਕ ਦੇ ਸਿਲੇਬਸ ਤੇ ਬੋਲਦਿਆਂ ਕਿਹਾ ਕਿ ਗੁਰੂ ਦੀ ਸਿਖਿਆ ਦੇ ਸ਼ਬਦ ਗਿਆਨ ਰੂਪੀ ਤਿੱਖੇ ਤੀਰ ਹੀ, ਥੋਥੇ ਕਰਮਕਾਂਡਾਂ ਦੀ ਛਾਤੀ ਵਿੰਨ੍ਹ ਸਕਦੇ ਹਨ। ਤਿੱਖੇ ਤੀਰ ਗੁਰਸ਼ਬਦੀ ਬਾਨ ਹਨ ਜਿਨ੍ਹਾਂ ਵਿੱਚੋਂ ਕਿਤੇ ਇੱਕ ਵੀ ਬਾਨ (ਤੀਰ) ਲੱਗ ਜਾਵੇ ਤਾਂ ਕਰਮਕਾਂਡ ਢਹਿ ਢੇਰੀ ਹੋ ਜਾਂਦੇ ਹਨ-ਕਬੀਰ ਸਤਿਗੁਰ ਸੂਰਮੇ ਬਾਹਿਆ ਬਾਨੁ ਜੁ ਏਕ॥ੁ ਲਾਗਤ ਹੀ ਭੁਇ ਗਿਰਿ ਪਰਿਆ, ਪਰਾ ਕਰੇਜੇ ਛੇਕੁ॥194॥ (1374)
ਬੇਏਰੀਆ ਪੰਜਾਬੀ ਸਹਿਤ ਸਭਾ ਕੈਲੇਫੋਰਨੀਆਂ ਦੇ “ਪ੍ਰਬੰਧਕ” ਪ੍ਰਮਿੰਦਰ ਸਿੰਘ ਪ੍ਰਵਾਨਾਂ ਨੇ ਪੁਸਤਕ ਦੇ ਪਰਚਾ ਪਾਠ ਵਿੱਚ ਸਮੁੱਚੇ ਲੇਖਾਂ ਦੀ ਮਹੱਤਤਾ ਨੂੰ ਉਭਾਰਦੇ ਹੋਏ ਮਹੱਤਤਵਪੂਰਣ ਦੱਸਿਆ, ਕਿ ਇਹ ਲੇਖ ਜੀਵਨ ਨੂੰ ਸੇਧ ਦਿੰਦੇ ਹਨ। ਲੇਖਕ ਕਿਰਤ-ਵਿਰਤ ਕਰਦੇ ਅਤੇ ਗ੍ਰਿਹਸਤੀ ਹੁੰਦੇ ਹੋਏ ਵੀ ਇੱਕ ਸਿਰੜੀ ਅਤੇ ਯੋਗ ਪ੍ਰਚਾਰਕ ਹੈ। ਪਦਾਰਥਵਾਦ ਦੀ ਦੁਨੀਆਂ ਵਿੱਚ ਸਮਾਂ ਕੱਢਣਾ ਅਤੇ ਅਜਿਹੇ ਵਿਸ਼ੇ ਤੇ ਲਿਖਣਾ ਬਹੁਤ ਮੁਸ਼ਕਲ ਹੈ ਜੋ ਗੁਰਮਤਿ ਗਿਆਨ ਰਾਹੀਂ ਹੀ ਸੰਭਵ ਹੋ ਸਕਦਾ ਹੈ। ਲੇਖਕ ਨੇ ਇਹ ਕਾਰਜ ਖਿੜੇ ਮੱਥੇ ਨਿਭਾਇਆ ਹੈ, ਇਸ ਲਈ ਉਹ ਵਧਾਈ ਦਾ ਪਾਤਰ ਹੈ।
ਗੁਰੂ ਗ੍ਰੰਥ ਪ੍ਰਚਾਰ ਮਿਸ਼ਨ ਆਫ ਯੂ.ਐੱਸ.ਏ. ਦੇ ਪ੍ਰਮੁੱਖ ਆਗੂ ਅਤੇ ਲਿਖਾਰੀ ਡਾ. ਗੁਰਮੀਤ ਸਿੰਘ ਬਰਸਾਲ ਨੇ ਭਾਈ ਅਵਤਾਰ ਸਿੰਘ ਮਿਸ਼ਨਰੀ ਨੂੰ ਇਸ ਜੋਖਮ ਭਰੇ ਕਾਰਜ ਨੂੰ ਪੂਰਾ ਕਰਨ ਤੇ ਵਧਾਈ ਦਿੰਦੇ ਹੋਏ, ਕਰਮਕਾਂਡਾਂ ਬਾਰੇ ਜਾਣਕਾਰੀ ਭਰਪੂਰ ਵਿਸਥਾਰਤ ਪਰਚਾ ਪੜ੍ਹਿਆ। ਭਾਈ ਮਿਸ਼ਨਰੀ ਦੀ ਬੇਨਤੀ ਨੂੰ ਪ੍ਰਵਾਨ ਕਰਦੇ ਹੋਏ ਮਨੁੱਖੀ ਅਧਿਕਾਰ ਸੰਸਥਾ ਦੇ ਆਗੂ ਅਤੇ ਅਮਰੀਕਨ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਜਨਰਲ ਸਕੱਤਰ, ਸ੍ਰ ਭਜਨ ਸਿੰਘ ਭਿੰਡਰ ਨੇ ਪ੍ਰਧਾਨਗੀ ਭਾਸ਼ਨ ਵਿੱਚ ਬ੍ਰਾਹਮਣਵਾਦ ਅਤੇ ਡਾ. ਅੰਬੇਡਕਰ ਬਾਰੇ ਬੜੇ ਵਿਸਥਾਰ ਨਾਲ ਦਸਦੇ ਹੋਏ ਕਿਹਾ ਕਿ ਭਾਈ ਮਿਸ਼ਨਰੀ ਦੀ ਪੁਸਤਕ ਚੋਂ ਇੱਕ ਟੂਕ “ਪੰਥ ਤੋਂ ਕਿਸੇ ਕਾਰਣ ਦੂਰ ਹੋ ਗਈਆਂ ਜਾਂ ਸਾਡੇ ਆਗੂਆਂ ਦੀ ਅਗਿਆਨਤਾ ਨਾਲ ਦੂਰ ਕਰ ਦਿੱਤੀਆਂ ਗਈਆਂ ਪੰਥਕ ਧਿਰਾਂ, ਜੋ ਸਿੱਖ ਪੰਥ ਦਾ ਇੱਕ ਅਨਿਖੜਵਾਂ ਅੰਗ ਹਨ, ਨੂੰ ਪੰਥ ਨਾਲ ਜੋੜਨ ਵਿੱਚ ਹੀ ਪੰਥ ਦਾ ਭਲਾ ਹੈ, ਸ੍ਰ. ਭਿੰਡਰ ਕਿਹਾ ਕਿ ਪੰਥ ਵਿਰੋਧੀ ਤਾਕਤਾਂ ਅਤੇ ਸਰਕਾਰਾਂ ਜੋ ਗੁਰੂ ਨਾਨਕ ਸਾਹਿਬ ਜੀ ਦੇ ਕ੍ਰਾਂਤੀਕਾਰੀ ਵਿਚਾਰਾਂ ਨੂੰ ਬਰਦਾਸ਼ਤ ਨਹੀਂ ਕਰਦੀਆਂ, ਉਹ ਹੀ ਕਰਮਕਾਂਡੀ ਡੇਰੇਦਾਰਾਂ ਨੂੰ ਹਲਾਸ਼ੇਰੀ ਦਿੰਦੀਆਂ ਹੋਈਆਂ, ਸਿੱਖ ਪ੍ਰਚਾਰਕਾਂ ਅਤੇ ਲਿਖਾਰੀਆਂ ਦੇ ਰਾਹ ਵਿੱਚ ਰੋੜੇ ਅਟਕਉਂਦੀਆਂ ਹਨ।
ਅਖੌਤੀ ਸੰਤਾਂ ਦੇ ਕੌਤਕ ਗਰੁੱਪ ਜੋ ਫੇਸ ਬੁੱਕ ਤੇ ਪਾਖੰਡੀਆਂ ਦੇ ਪਾਜ ਉਘੇੜਦੇ ਹੋਏ, ਭੇਖੀ ਸਾਧਾਂ, ਹੰਕਾਰੀ ਲੀਡਰਾਂ ਅਤੇ ਅਖੌਤੀ ਜਥੇਦਾਰਾਂ ਨਾਲ ਗੁਰਮੱਤੀ ਜੰਗ ਲੜਦੇ ਹੋਏ ਦੋ ਹੱਥ ਹੋ ਰਹੇ ਹਨ, ਦੇ ਬੇਏਰੀਏ ਦੇ ਆਗੂ ਗੁਰਸੇਵਕ ਸਿੰਘ ਪਿੰਡ ਰੋਡੇ ਨੇ ਇਸ ਕਾਰਜ ਦੀ ਸ਼ਲਾਘਾ ਕਰਦੇ ਹੋਏ, ਭਾਈ ਅਵਤਾਰ ਸਿੰਘ ਮਿਸ਼ਨਰੀ ਅਤੇ ਬੀਬੀ ਹਰਸਿਮਰਤ ਕੌਰ ਖਾਲਸਾ ਦੀ ਨਵੰਬਰ 2011 ਸਿੰਘਾਪੁਰ-ਮਲੇਸ਼ੀਆ ਅਤੇ ਦਸੰਬਰ-ਜਨਵਰੀ 2011-12 ਪੰਜਾਬ ਦੀ ਪ੍ਰਾਚਰ ਫੇਰੀ ਦਾ ਸਫਰਨਾਮਾਂ ਬੜੀ ਭਾਵਕਤਾ ਨਾਲ ਸੁਣਾਇਆ ਅਤੇ ਕਿਹਾ ਕਿ ਸਾਡੇ ਇਹ ਵੀਰ ਅਤੇ ਭੈਣ ਜੀ ਚਲਦੇ ਫਿਰਦੇ ਵੀ ਗੁਰਮਤਿ ਦਾ ਪ੍ਰਚਾਰ ਕਰਦੇ ਰਹਿੰਦੇ ਹਨ। ਸਥਾਨਕ ਗੁਰੂ ਘਰਾਂ ਨੂੰ ਵੀ ਇਨ੍ਹਾਂ ਦੇ ਗੁਰਮਤਿ ਪ੍ਰਚਾਰ ਤੋਂ ਲਾਹਾ ਲੈਣਾ ਚਾਹੀਦਾ ਹੈ।
ਸਿੰਘ ਸਭਾ ਇੰਟ੍ਰਨੈਸ਼ਨਲ ਸੈਕਰਾਮੈਂਟੋ ਦੇ ਵਿਦਵਾਨ ਆਗੂ ਪ੍ਰੋ. ਮੱਖਨ ਸਿੰਘ ਨੇ ਬੋਲਦਿਆਂ ਕਿਹਾ ਕਿ ਸੱਚ ਬੋਲਣਾ, ਸੁਣਨਾ ਅਤੇ ਲਿਖਣਾ ਬੜਾ ਔਖਾ ਹੈ। ਮਿਸ਼ਨਰੀ ਜੀ ਜੋ ਆਪਣੀ ਕਿਰਤ ਕਰਦੇ ਹੋਏ ਵੀ ਸਰਗਰਮ ਪ੍ਰਚਾਰਕ ਹਨ, ਸੱਚੋ ਸੱਚ ਪ੍ਰਚਾਰ ਕਰ ਅਤੇ ਲਿਖ ਰਹੇ ਹਨ। ਉਨ੍ਹਾਂ ਨੇ ਬੜੇ ਵਿਅੰਗ ਨਾਲ ਕਿਹਾ ਕਿ ਗੁਰਬਾਣੀ ਨੂੰ ਰੋਜੀ ਰੋਟੀ ਦਾ ਸਾਧਨ ਬਣਾਉਣ ਵਾਲੇ ਖੁੱਲ੍ਹ ਕੇ ਸੱਚ ਬੋਲ ਜਾਂ ਲਿਖ ਨਹੀਂ ਸਕਦੇ ਕਿਉਂਕਿ ਰੋਜੀ ਰੋਟੀ ਖੁਸਣ ਦਾ ਡਰ ਰਹਿੰਦਾ ਹੈ। ਉਂਨ੍ਹਾਂ ਨੇ ਇਸ ਬਾਰੇ ਉੱਘੇ ਪ੍ਰਚਾਰਕ ਗਿ.ਜਗਤਾਰ ਸਿੰਘ ਜਾਚਕ ਨਿਊਯਾਰਕ ਨਾਲ ਹੋਈ ਗਲਬਾਤ ਦਾ ਵੀ ਜਿਕਰ ਕੀਤਾ। ਪੰਜਾਬੀ ਸਹਿਤ ਸਭਾ ਬੇਏਰੀਏ ਦੇ ਸਾਬਕਾ ਪ੍ਰਧਾਨ ਤਾਰਾ ਸਿੰਘ ਸਾਗਰ ਨੇ ਵੀ ਭਾਈ ਮਿਸ਼ਨਰੀ ਦੇ ਇਸ ਉਦਮ ਦੀ ਸ਼ਲਾਘਾ ਕਰਦੇ ਹੋਏ ਵਧਾਈ ਦਿੱਤੀ। ਪ੍ਰੋ. ਸੁਰਜੀਤ ਸਿੰਘ ਨਨੂੰਆਂ ਨੇ ਵੀ ਹਾਜਰੀ ਭਰੀ। ਅਖੰਡ ਕੀਰਤਨੀ ਜਥੇ ਦੇ ਗੁਰਮੁਖ ਪਿਆਰੇ ਲਿਮੋਜੀਨ ਵਾਲੇ ਬਾਣਾਧਾਰੀ ਭਾਈ ਫਤਿਹਜੀਤ ਸਿੰਘ ਨੇ ਵੀ ਭਾਈ ਮਿਸ਼ਨਰੀ ਨੂੰ ਹਾਰਦਿਕ ਵਧਾਈ ਦਿੱਤੀ। ਗੋਲਡ ਕੈਬ ਫਰੀਮਾਂਟ ਦੇ ਸ੍ਰ. ਜਸਦੀਪ ਸਿੰਘ ਕਵੀਸ਼ਰ ਨੇ ਕਿਹਾ ਕਿ ਹਰ ਹਫਤੇ ਗੁਰਮਤਿ ਤੇ ਲੇਖ ਲਿਖਣਾ ਬੜਾ ਔਖਾ ਹੈ, ਭਾਈ ਅਵਤਾਰ ਸਿੰਘ ਬੜੇ ਮਿਹਨਤੀ ਹਨ ਜੋ ਕਿਰਤ ਕਰਦੇ ਵੀ ਲਿਖੀ ਜਾ ਰਹੇ ਹਨ, ਸਾਡੇ ਵਰਗੇ ਤਾਂ ਇੱਕ ਲੇਖ ਲਿਖਣ ਤੇ ਹੀ ਛੇ-ਛੇ ਮਹੀਨੇ ਲਾ ਦਿੰਦੇ ਹਨ।
ਆਖੀਰ ਵਿੱਚ ਬੀਬੀ ਹਰਸਿਮਰਤ ਕੌਰ ਖਾਲਸਾ ਨੇ, ਆਪਣੇ ਸਿੱਖ ਬਣਨ ਅਤੇ ਪ੍ਰਚਾਰਕ ਫੇਰੀ ਸਮੇਂ, ਫਾਊਂਡਰ ਪ੍ਰਿੰਸੀਪਲ ਸ੍ਰ. ਜਸਬੀਰ ਸਿੰਘ ਅਤੇ ਮਰਹੂਮ ਬਾਬਾ ਨੰਦਨ ਸਿੰਘ ਰਾਹੀਂ, ਭਾਈ ਅਵਤਾਰ ਸਿੰਘ ਨਾਲ ਨਾਤਾ ਜੋੜਨ ਦਾ ਜਿਕਰ ਕਰਦੇ ਕਿਹਾ ਕਿ ਗੁਰਮਤਿ ਦੇ ਤਿੱਖੇ ਤੀਰ ਜੇ ਮੇਰੇ ਸੀਨੇ ਲੱਗ ਕੇ, ਮੇਰਾ ਜੀਵਨ ਬਦਲ ਸਕਦੇ ਹਨ ਤਾਂ ਕੀ ਕਰਮਕਾਂਡੀ ਸਿੱਖਾਂ ਦਾ ਕਿਉਂ ਨਹੀਂ? ਮੈਂ ਦੇਖਦੀ ਹਾਂ ਕਿ ਮਾਈ ਬੈਟਰ ਹਾਫ ਸਾਰੀ ਰਾਤ ਕੰਮ ਕਰਕੇ ਵੀ ਸਵੇਰੇ ਉੱਠ ਕੇ ਲਿਖਣਾ ਅਤੇ ਵਾਚਣਾ ਸ਼ੁਰੂ ਕਰ ਦਿੰਦੇ ਹਨ।
ਜਿਹੜੇ ਸੱਜਨ ਰੁਝੇਵਿਆਂ ਕਰਕੇ ਨਹੀਂ ਪਹੁੰਚ ਸੱਕੇ, ਉਨ੍ਹਾਂ ਵਿੱਚ ਡਾ. ਗੁਰਦੀਪ ਸਿੰਘ ਸੈਨ ਹੋਜੇ, ਪੰਜਾਬੀ ਸਹਿਤ ਸਭਾ ਦੀ ਪ੍ਰਸਿੱਧ ਲੇਖਕਾ ਬੀਬੀ ਮਨਜੀਤ ਕੌਰ ਸ਼ੇਖੋਂ ਸੈਕਰਾਮੈਂਟੋ, ਖੋਜੀ ਵਿਦਵਾਨ ਅਤੇ ਲਿਖਾਰੀ ਸਰਬਜੀਤ ਸਿੰਘ ਸੈਕਰਾਮੈਂਟੋ, ਪ੍ਰਸਿੱਧ ਵਿਦਵਾਨ ਲੇਖਕ ਚਰਨਜੀਤ ਸਿੰਘ ਪੰਨੂੰ ਅਤੇ ਪੰਥ ਦੇ ਪ੍ਰਸਿੱਧ ਲਿਖਾਰੀ ਅਤੇ ਆਗੂ, ਸਾਬਕਾ ਸ਼੍ਰੋਮਣੀ ਕਮੇਟੀ ਮੈਂਬਰ, ਸ੍ਰ. ਤਰਲੋਚਨ ਸਿੰਘ ਦੁਪਾਲਪੁਰ ਨੇ ਵੀ ਭਾਰਤ ਤੋਂ ਬੜੀ ਗਰਮਜੋਸ਼ੀ ਨਾਲ ਵਧਾਈ ਸੰਦੇਸ਼ ਭੇਜੇ ਹਨ।
ਇਸ ਸਮਾਗਮ ਵਿੱਚ ਵਿਸ਼ੇਸ਼ ਤੌਰ ਤੇ ਹਾਜਰ ਸਨ ਗੁਰਮਤਿ ਦੇ ਪ੍ਰਸਿੱਧ ਲਿਖਾਰੀ ਸ੍ਰ. ਮਝੈਲ ਸਿੰਘ ਸੈਨਹੋਜੇ, ਜੋਸ਼ੀਲੇ ਨੌਜਵਾਨ ਆਗੂ ਭਾਈ ਕੁਲਵੰਤ ਸਿੰਘ ਮਿਸ਼ਨਰੀ ਸੈਨਹੋਜੇ, ਬਜੁਰਗ ਆਗੂ ਸ੍ਰ. ਨਗਿੰਦਰ ਸਿੰਘ ਬਰਸਾਲ, ਕਮਲਦੀਪ ਸਿੰਘ, ਭਾਈ ਰਤਨ ਸਿੰਘ, ਸ੍ਰ. ਦਰਸ਼ਨ ਸਿੰਘ ਹੇਵਰਡ, ਭਾਈ ਰਾਜਬੀਰ ਸਿੰਘ, ਬੀਬੀ ਸੁਰਜੀਤ ਕੌਰ, ਬੀਬੀ ਗੁਰਪ੍ਰੀਤ ਕੌਰ, ਬੀਬੀ ਜਸਪ੍ਰੀਤ ਕੌਰ ਅਤੇ ਬੀਬੀ ਇਕਬਾਲ ਕੌਰ ਆਦਿ।
ਅੰਤ ਵਿੱਚ ਭਾਈ ਅਵਤਾਰ ਸਿੰਘ ਮਿਸ਼ਨਰੀ ਨੇ ਸਭਨਾਂ ਦਾ ਧੰਨਵਾਦ ਕਰਦੇ ਹੋਏ ਕਿਹਾ ਕਿ ਜਿਸ ਕੋਲ ਵੀ ਇਹ ਪੁਸਤਕ ਪਹੁੰਚਦੀ ਹੈ, ਉਹ ਇਸ ਨੂੰ ਪੜ੍ਹ ਕੇ, ਆਪਣੇ ਕੀਮਤੀ ਸੁਝਾਅ ਜਰੂਰ ਭੇਜਣ ਦੀ ਕ੍ਰਿਪਾਲਤਾ ਕਰੇ।
ਪ੍ਰੈਸ ਨੋਟ ਜਾਰੀ ਕਰਤਾ-
ਪ੍ਰਮਿੰਦਰ ਸਿੰਘ ਪ੍ਰਵਾਨਾਂ
510-415-9377
02-03-12